Aizawl; ZNP chuan, “Finance Minister Pu Lalsawta’n Congress Bhavan a 'Minister-te dinhmun tihzahawmna atan motor thar lei a tul' tia a sawi chu lungchhiat thlak kan ti tak zet a ni,” tiin thuchhuah an siam. Nimina thuchhuah an siamah ZNP chuan Mizoram Congress sorkar kalhmang chu kutdawh chunga readymade suit hak ang niin an tarlang a. MLA te, Parliamentary Secretary leh Minister te chu dinhmun zah awma awm, mipuite thlan, mipuite chung lam, dan siamtu, mipui tana mawhphurtu nia sawiin khawi hmunah pawh, eng hunah pawh mipuite hruaitu an nih thu an tarlang bawk a. ZNP chuan “Chungte chu zah awmnaa ngai lovin Mizoram sorkar sum dinhmun nasa taka a chhiat laia motor car man to leh nalh taka tlan fua fua hi zahawmnaa an ngai a nih chuan Mizo mipuite hian he Congress sorkar lak atang hian eng thil ropui mah beisei chi a ni lo tih kan pawm hmiah a ni,” an ti bawk a ni. Congress sawrkarin Power & Electricity Department corporation-a a dah loh chhan chu an ngaihpawimawh zawng anih loh vang niin an sawi a. Ram siam thatna tak tak aiin supply order leh work order inpekna remchang atan an hman duh vangin P&E department hi an la hum hram hram chauh ah an ngai tih ZNP thuchhuah chuan a tarlang. ZNP chuan Finance Minister-in sum lakluh dan an ngaihtuah dawn tia a sawi chu lawmawm an ti hle tih an sawi a, Mizoram sum dinhmun siamthat duh tak takna atana hma lakna reng reng-ah ZNP chu opposition party tangkai a ni dawn tih sawiin ngaihdan leh thurawn pek an inpeih reng niin an sawi.