Aizawl: Aizawl khawpui chhunga kangmei a chhuah palha \helhna tura tui lakna Public Health Engineering Depatment (PHED) in a siam thar Fire Hydrant-a pipe vuahna tur bawk chu January 16, 2017 thlenga Department in a chhinchhiahna a neihah 60 a bo tawh. Fire Hydrant bawk bo dan PHED hotuten Local Council huam chhung anga an chhinchhiah danin Aizawl Venglai ah 2, Bawngkawn ah 2, Bawngkawn South ah 1, Chaltlang ah 5, Chaltlang North ah 1, Chanmari ah 4, Edenthar ah 1, Electric Veng ah 5, Laipuitlang ah 1, Ramhlun North ah 4, Ramhlun Sport Complex ah 1, Ramhlun South ah 3, Ramhlun Venglai ah 1, Ramhlun Vengthar ah 6, Ramthar North ah 2, Ramthar ah 3, Tuithiang ah 1, Zemabawk ah 2, Zonuam ah 2, Zotlang ah 1, Bethlehem ah 3, Republic Vengthlang ah 2, Republic ah 1, Armed Veng ah 1, Tuikhuahtlang ah 1, Dinthar ah 2 leh Tuikual ah 1 anih thu Zalen chuan a dawng. Zalen palai zawhna chhangin PHED hotute chuan Fire Hydrant chu Aizawl veng hrang hrangah chi hnih an vuah thu an sawi a, pakhat chu a lian Fire Department Motor in tui an chawi theihna tur a ni a, pakhat hi motor thlen theih lohna hmuna pipe vuah mai theihna tur a te chi a ni a, tuna bo zawng zawng hi a te chi vek niin PHED hotute chuan Zalen palai an hrilh. PHED hotuten Zalenpalai an hrilh danin Fire Hydrant bawk bo hi dara siam niin pakhat hi Rs 3495 a ni a, a bo zawng zawng hi Rs 2,09,700 man hu a ni. PHED hotute chuan Zalen palai zawhna chhangin a bo te chu vuah leh zung zung theih a ni lo tih an sawi a, "Fund a zawh tawh avangin sorkarin provision a dah belh leh loh chuan vuah theih a ni lo," an ti a. "Vuah tawh bakah zawh chiah te pawh a bo a, FIR te pawh kan thehlut a, hmuhchhuah a la awm rih lo," tiin an sawi bawk. Heng fire hydrant bul hnaia kangmei chhuak a awm chuan PHED control room (Ph. 0389-2329909 & 0389-2320944) biain tui chhuah tir theih anih dawn thu PHED hotute chuan Zalen palai an hrilh bawk.