Aizawl khawpui chhunga kangmei a chhuah palha Kang thelh motor-te’n tui an lakna tura Public Health Engineering Department (PHED) in a siam thar Fire Hydrant-a pipe vuahna tur bawk chu 60 ruk bo a ni tawh tih an sawi a. FIR te thehlutin hmuh let an la nih loh thu an sawi bawk. Fire hydrant pakhat man hi cheng sangthum leh zanga man vel a ni a, a bo hi suma chan tir chuan cheng Nuai 2 man chuang lai a ni a, a thlakna tur sum hi a fund a zawh tawh avangin sorkarin provision a dah belh leh loh chuan vuah theih a ni loh thu PHE hotute lam chuan an sawi bawk a ni. Hydrant bo te hi vuah an nih hnu deuha bo leh vuah zan la laa bo te pawh a awm bawk a ni. Kangmei chhuak thelh kawngah hian tun hma atanga harsatna kan tawh thin chu a thelhna tur ‘tui’ a ni fo thin, kangthelh motor in tui a chawi chawp avanga duh anga kang thelh hleih theih loh chang a awm thin a. Thelh laklawh laia tui a zawhin chawi tura tlan leh vang vang a ngai ta thin a, hemi avang hian kang thelh lam chu an hna tlin lovah kawh an ni fo thin a. Bungrua chhan hman turte pawh a kang ral fo thin ang tih a rinhlelh awm lem lo bawk ang. Fire hydrant hi kang thelhah thil tangkai tawpkhawk tur a ni a, kawngpui dung sirah kang thelh motor te pipe in tui an duh ang tawk an thun mai thei a, tui indaih loh pawhin tui chawia hmun hla tak tak tlan vang vang a ngai tawh dawn lo tihna a ni a. Kangthelh tan a awlsam mai a ni lova mipui tan pawh himna tam zawk a thlen thei tura ngaih a ni. A pawimawhna a san em avang hian hnuchhui kawngah pawh police te pawhin tun ai hian tan an lak lehzual a tul hle awm e. PHE Department lam pawhin hydrant te hi vuah nawn leh tumin hma an lak a ngai a, rukbo a nih tawh lohna turin remruatna siam a tul hle tih a lang a, Department tel awm dangte nen zau zawka inrawnkhawm te pawh a tul dawn niin a lang. Rubo tute thil tih hian nghawng thui tak a nei dawn tih a lang reng a, bungraw leh thil dang kang ral lova chhan hman tur tam tak a hman tlak lovin a kang chhe hman dawn tihna a ni a. Hemi mai hi nilovin nunna chan lo tur te pawhin an chan phah thei hial awm e. Heng lo pawh hi nghawng rapthlak tak tak a awm ngei ang. Sawrkar thil mahni ta anga kan en thei lo hian zir tur kan la ngahzia a pholang a. A rutu te hian an mahni bungrua tho an ru a ni tih lo hre in teh se. Hmabak a ko thin mang e.