Aizawl; Fisheries Minister Dr. B.D. Chakma chuan nimin khan Serlui B Hydel Project dil chhunga Fisheries Department-in Pangasius sangha khawina an siam, pindan 44 chu Builum khuaa chhungkaw 44-te inenkawl tawm turin a hlan. Dr. B.D. Chakma chuan sangha khawina pindan hi Tamdil-ah 4 leh Serlui-ah 15 dang buatsaih thuai a nih thu a sawi bawk. Pangasius sangha hi tui thianghlima khawi chi a ni a; sangha thang chak tak leh thar hlawk tak a ni. Sangha khawina tur dil siamna nei remchang ve lo ram Malaysia leh ram thenkhatah hetianga luipui khuah chhunga len hmanga hunga vulh hi an uar hle a ni. Fisheries Department-in Serlui B Hydel Project dil chhungah hian hetiang pindan hi feet 15 bial, feet 12 vela thukin an siam thliah a, pindan khatah hian Pangasius sangha chi 3500 zel an dah a. Kum khat chhungin pindan khat atang hian quintal 10 thar thei tura beisei a ni a, a thar hlawkna hmunah chuan quintal 20/30 hial te a thar theih thu Pu Laldawngliana, Kolasib District Fisheries Development Officer chuan a sawi a. Hetianga sangha khawi hi sawrkar leh mipuiin tha intawm, Public Private Partnership (PPP) hmanga an kalpui thu sawiin, Pu Laldawngliana chuan, “Department-in a khawina leh a sangha chi bakah, a chaw kan tum a. Society lamin a enkawl an tum ve thung a; a seng hunah 50% in kan inchansem dawn a ni” a ti. Dr. B.D. Chakma hi Pu Kali Kumar Tongchongya, Chakma Autonomous District Council Chairman te, Pu S.P. Singh, Deputy Director, Fisheries leh official dangten an tawiawm a ni.