Aizawl: Nimin chawhma dar 11 khan Central YMA leh Mizoram Building & Other Construction Workers Welfare Board in an buatsaih Floor Tile Mistiri Training chu Central YMA Hall ah LE&IT Minister Lalrinmawia Ralte in khuallian niin a khar. Kharna inkhawmCentral YMA Vice President Vanlalruata kaihhruai ah hian thu sawiin LE&IT Minister Lalrinmawia Ralte chuan thiman bik (skill) a pawimawh dawn nia sawiin, "Kaladan Multi Modal Transit Transport Project (KMMTTP) hi India in a ti hlawhtling dawn chiang a, tunah pawh phase 2 a awm leh tawh a. North-east hi a kawtchhuah kan ni dawn a, skill neihin kori a tu dawn a, chuvangin Mizo hnam kan dinchhuah nan chuan hei hi mutmawh hnar mawha kan neih a ngai, " a ti. Floor Tile Mistiri Training kharna ah hian hlawhtling taka training chhuak te hnenah khawl pek a ni a,  YMA hruaitu leh sawrkar mi pawimawh te'n an hlan a ni. Central YMA General Secretary chuan Zalen palai zawhna chhangin training chhuak te tan ruahmanna an siam thu a sawi a, "An awmna Branch theuhah ngenna kan siam ang a, Mizo mipui a tam thei ang berin an chhawr theih nan an hming leh an biaktheihna hi a zau thei ang bera thawn darh kan tum a ni," a ti a. Cement mistiri training te nen belhkhawmin Mizoram pumah thalai rual 700 zetin an training tir tawh tih a sawi bawk.