ZALEN January 17, 2025 : ZORO General Headquarters vawiina meeting chuan India Sawrkarin Free Movement Regime (FMR) thiat a, India - Myanmar Border fencing a tum chungchang leh Bangladesh raltlan thawnkir chungchang an rel a, FMR order kengkawh tura sawrkar laipui leh Mizoram sawrkar order chu hal turin thutlukna an siam.

India sawrkar laipui in Zofa ram hrang hranga chengte zalen taka kan intlawh pawh theihna Free Movement Regime (FMR) chu thiatin ramri kan turte tan Border Pass neih ngei a tul leh Border Pass neilo tan ramri kan a theih lohna dan chu January 1, 2025 atangin ken kawh tan a ni a. Free Movement Regime ti tawpa India-Myanmar ramri kan tura Border Crossing Permit lak a ngai ta chu Zo Re-Unification Organisation (ZORO) chuan pawi a ti. Free Movement Regime (FMR) kengkawh tura tihna Sawrkar laipui order leh Mizoram Sawrkar order chu January 29, 2025 (Nilaini) hian an hal dawn a, Sawrkar laipui leh Mizoram sawrkar order hi Aizawl mai bakah Mizoram hmun hrang hranga hal turin ruahmanna a siam a ni.

ZORO chuan Free Movement Regime a tih tawpna hi hlip leh ngei turin an ngen a, he dikna chanvo nei let leh tur hian ZORO chuan a tawp thlengin a bei zel dawn an ti a ZORO hmalakna hi Zoram mipui ten thlawp tlat turin an ngen nghal bawk a ni.

Bangladesh rambuai avangin Mizoram state rawn bel Mizoram chhungah thahnem tak an awm mek a. January 5, 2025-a Bangladesh atangin sahimna zawnga mi 28 in Mizoram rawn lut, Assam Rifle in an man a an hreng zui, January 11, 2025-a Mizoram sawrkar leh Assam Rifle ruahmannaa thawnkir an ni chu ZORO chuan hriatthiam har an ti.

ZORO chuan mahni sahimna zawnga Mizoram rawn bel te thawnkir an ni chu na a ti a, unaute thawnkirtu Mizoram sawrkar leh Assam Rifle te demawm an ti. "Kan unau sahimna zawnga rawn kal an awm leh a nih chuan mahni Inpui rawn bel na na na chu lo kuangkuah a, lo tuamhlawm thin tawh turin thunei tute kan ngen nghal bawk a ni," an ti.