American rock band Foo Fighters chuan album thar an tichhuak leh dawn tih an puang chiang ta. Foo Fighters hi an drummer Taylor Hawkins tel loa an kal chhoh a ngai dawn a, a hmun ruak zau hle mah se rimawi khawvel chawlhsan phah nan hman mai an tum lo. 

An drummer chhuanvawr Taylor Hawkins hi March 25, 2022 khan a boral a, a thih hian kum 50 mi chauh a la ni. Foo Fighters te hian nikum khan tour an nei a, Colombia-a an awm laiin Taylor Hawkins hi a thi thut a nih kha. Hei hian an band-ah nghawng lian tak a nei zui a, tour an neih hmabak pawh an titawp vek a nih kha. 

Band anga chet chhuah loh reng erawh an tum bik hauh lo a, tun hnai khan album an tihchhuah tur thu an puang. An album thar tur hi 'But Here We Are' tih a ni a, hla 10 a awm dawn a, June 2-ah tlangzarh a ni ang. Taylor Hawkins awm loh hnua an single hmasa ber 'Rescued' pawh an tichhuak nghal bawk. 

Foo Fighters hian an bandmate Hawkins hi an sun hle a, a hriatrenga concert pawh tum hnih an buatsaih. London, UK leh, Los Angeles, US-ahte memorial concert hi an buatsaih a, ngaihhlut a hlawh hle a ni. Paul McCartney, Liam Gallagher leh Brian May te pawh a puala hun an buatsaihah hian an perform a ni.