Aizawl: Chief Minister Lal Thanhawla chuan Zirtawpni khan Food Testing Laboratory thar, Central Medical Store Building, Zemabawkah a hawng.   Hawnna thu sawiin Chief Minister chuan, “Thenawm state atanga ei leh in tur, sa, thlai thar leh thil dang chawk luh reng kan ngaih avangin thil tha lo an pawlh nia ngaihna lian tak nei mah ila tihnghaihna dang a awm si lo a, ngaih tha lo takin kan awmna a rei tawh hle a. Laboratory changtlung tak kan neih tak avangin hemi kawnga kan harsatna hi a su kiang dawn a ni,” a ti.   Thusawitu dang Commerce & Industries Minister H.Rohluna pawhin thu sawiin, “Hlawkna um avanga mihring hriselna atana pawi thei tur pawlh belh ching te lak atanga kan fihlim theih nan he Laboratory thar hi a tangkai hle dawn a ni,” a ti.   Health Minister Lal Thanzara pawhin, “Mizoram chu International Boundary-a awm kan nih avangin ei tur tam tak foreign atangin a lo lut a, hengte hi uluk taka zirchian leh test vek a tul bakah Mizoram chhung ngeia kan thil siamte pawh quality tha a nih theih nan endik a tul thin a ni,” a ti bawk.   Food Testing Laboratory ah hian ei leh in tur sawngbawlna atana thil hman chi hrang hrang a hmel tihmawina, a tihrimtuina, a vawn thatna, a tihthlumna te a test theih a. Mihring tana hlauhawm thei chemical chi hrang hrang awm te, ei leh in tura natna hrik bacteria chi hrang hrang te, thlai ei tura tur hlauhawm amaha insiam leh pawlh a awm em tih te a endik theih bakah damdawi, a bik takin antibiotic test thlengin a huam a ni. &&&&