Kum 2022 Ballon d’Or dawngtu thei tur te chu zanin hian France khawpui Paris-a Théâtre du Châtelet-ah puan an ni dawn. He chawimawina hi French news magazine France Football chuan season khat chhunga footballer khel tha ber hnenah a hlan thin a ni.

Ballon d’Or hi football khawvel-a mimal lawmman ropui ber anga ngaih a ni a, a thlan dn pawh an duh uluk a, a dawngtu tur chu media aiawh, FIFA hnuaia national team captain leh coach-ten vote khat theuh neiin an thlang thin. 

Kum 1995 thleng khan Ballon d’Or hi European player te chauh pek thin an ni a, hemi hnu hian khawvel hmun hrang hrang aṭanga European club a khel te pek ve ṭhin an ni a, kum 2007 khan atang phei kha chuan huam chin zauh lehin khawvel hmun hrang hrang a footballer tha te pawh telh thei an nileh ta.

Football chanchina Ballon d’Or dawng hnem ber ber player 5 te chu i han thlir dawn teh ang.

5. Marco van Basten - (3 Ballon d'Or)

Marco van Basten hi he infiamna chanchina striker thah ber pawl a ni. Dutch national team bakah Ajax leh AC Milan tan pawh ropui takin a khel tawh. A career rei lo te chhungin heng club pahnih tan hian ropui takin a khel hman a ni. 

Ballon d’Or vawi thum la thei Van Basten hi FIFA Player of the Century internet poll-ah 6-na a ni phak. Kum 1988 khan a vawi khat nan he chawimawina hi a dawng a, hemi kum hian Netherlands national team chu Euro-ah a champion pui a ni. He tournament-a goal khung hnem ber niin Golden Boot a dawng nghe nghe.
 
Van Basten hian kum 1989 khan a zawnin Ballon d'Or a dawng a, AC Milan chu European Cup-ah a champion pui a, kum 1992 khan he chawimawina hi a vawi thum nan a dawng leh a ni.

4. Michel Platini - (3 Ballon d'Or)

'Le Roi' (The King) Michel Platini hi French football chanchina mi pawimawh ber pakhat a ni a, a hun laia football-a France chawilartu a ni. He playmaker hi a chantupa chet hun an tih anga khan a che thin a, club leh ram lamah pawh a lar phah hle a ni.
 
Kum 1984 European Championship-ah khan Les Bleus chu a champion pui a, 80's bawr chho tan tir phei kha chuan a ni aia footballer tha khawvel-ah khan an awm bik lo. A zawnin kum thum (1983, 1984 leh 1985) Ballon d’Or a dawng thei a ni.

Platini chu FIFA.com hnenah French superstar Zinedine Zidane chuan Platini chu a hero a nih thu leh a ngaihsan thin zia a sawi a. "Kan naupan laia kan inkhelh chang khan Platini nih hi ka thlang fo thin. Ka thiante chu ka idol dang ho ka insem tir thin a ni," a ti

3. Johan Cruyff - (3 Ballon d'Or)

Dutch magician Johan Cruyff hi footballer ropui ber pawl a nih mai bakah he infiamna thlak danglamtu nia sawi a ni. Football-a sul sutu a nih bakah player leh manager angin career ropui tak a hmang a, a ‘total football’ philosophy chu a lar pui hle a ni. 

Cruyff hian a hun tir lamah Ajax tan hun a hmang a, league title vawi riat zet a chawi pui. Dutch ram tan European cup vawi thum a chawi bawk. Cruyff hian kum 1973 khan Barcelona a pan a, Catalan tana a season hmasa berah La Liga nomawi a chawi.

Kum 1999 khan European Player of the Century atan thlan a ni a, Cruyff hian Ballon d’Or vawi thum (1971, 1973 leh 1974) a dawng a ni.

2 Cristiano Ronaldo - (5 Ballon d'Or)

Cristiano Ronaldo hi he game ropui tak chanchina goal khung hnem ber a ni tih hi sawi loh theih a ni lo. Portuguese icon hi mipa international football-a goal khung hnem ber a ni a, goal 117 a thun tawh. Professional football club tan goal 700 a thun tling tawh bawk. Career ropui tak la hmang mekin kum 37 mi ni tawh mah se a la chak tha em em a ni.

Ronaldo hian a career chhungin vawi nga zet Ballon d’Or a dawng tawh a, he infiamna chanchina forward hlawhtling ber pakhat a ni. Winger anga bul a tan hnuah Ronaldo hian zawi zawiin forward lai lum a chang a, a tawpah centre-forward-ah a inthlak ta a ni.

1. Lionel Messi - (7 Ballon d'Or)

Lionel Messi hi footballer piang tawh zinga ropui ber tia sawi ngam a ni. Ballon d’Or tum 7 zet dawn theih hi khawvelah an la piang lo.

Argentinian legend hian international-ah a ram a chet that pui thei lo viau naa, tun hnaiah copa lak puiin World Cup chawi tumin an inbuatsaih leh mek.