Mipa FIFA world ranking hi ram tin football association te chet that dan a zira siam thin a ni. Hnamni lawkah ranking thar kan rawn ziak tawh naa tun hnaiah international match a awm vangin danglam a awm leh nual a, chung dinhmun danglam zingah chuan football ram lian France, Italy leh Spain ten hma an sawn laiin England leh Portugal te erawh a tla hniam thung. Pakhatna Belgium leh pahnihna Brazil ten an dinhmun ngai an luah a, top ten zingah Argentina, Mexico leh Denmark te dinhmun pawh a dang lam lo.

Football thuneitu sang ber FIFA chuan an game result atangin ranking hi an siam thin a, team hlawhtlin dan a zirin an dinhmun hi a danglam ve reng thung. He ranking hi kum 1992 December thla atang khan siam tan a ni a, Brazil hi pakhatna nihna hauhtu hmasa ber ram an ni. 2018 August ni 16 atang khan an ranking siam thin dan chu ti danglam hlekin Elo rating system an hmang tan a, tun thlengin an hmang zui.

Top 10 huanga awm te chu:
#10 Denmark- 1668.98 pts
    Denmark hi kumin European Championship a team tha ber zing ami kha an ni a, kha tournament-ah khan semi-final hial an thleng phak a nih kha. An manager Kasper Hjulmand hian a player te a hmang thiamin team tha tak a din thei.     Denmark hian khelmual chhunga tawn hriat ngah Kasper Schmeichel, Simon Kjaer leh Thomas Delaney te an neih bakah player naupang lamah Mikkel Damsgaard leh Mohamed Daramy te pawh hi team thlamuanpui tham ve tawh tak chu an ni. 2022 World Cup khel turin Denmark hi an tling tawh a, World Cup khel tur hian an ni ram tih loh ram pahnih a thlengtu branch Qatar leh Germany chiah an la tling chiang a ni.

Denmark hi Euro-a an khelh that piah lamah FIFA hnuaia inkhelhah an che tha thei hle a, Qatar lamah pawh hian team tawh khirh ber tur zing ami an ni ngei ang. 

#9 Mexico- 1672.92 pts
    Mexico hi langsar vut lem lo hian team chhia an ni ngai lo. Squad-ah hian mi talent nei tha leh tawn hriat ngah tak tak an inphum nual a, 2021 CONCACAF Gold Cup-a pahnihna an nih khan football khel thiam ram an nih chu a lan tir awm e. Final-a United States of America laka an tlawm mai erawh an la na ve viauin a rinawm.         Napoli forward Hirving Lozano hi an player chhuanvawr a ni mek a, manager Gerardo Martino hlimna thlen turin Wolverhampton Wanderers striker Raul Jimenez hliampui tuar pawh dam tha tawhin squad lamah telh a ni leh tawh. 

#8 Portugal- 1681.73 pts
    Portugal mipa national team dinhmun hi a chiang rih lo hle a, player nei tha siin Euro 2020-ah beisei an phak lova, an chet chhiat chhanah hian thenkhat chuan an manager Fernando Santos an puh.

Santos hi ropui taka Portugal tana Euro 2016 nopui hawn saktu kha a ni lawi a, he Portuguese pa fing tak hian manager a nihna kawngah experience a ngah tawh hle. Mahse a team te a khelh tir duh dan hian team chakna a siam thei rih lo thung. Portugal hi tunah khawvel huap pawha squad nei tha ber zing ami an ni a, player an neih that ngaihtuaha an result lam a that hleih thei loh vang hian an coach hi an dem ta a ni ber awm e.

An captain chuai lam pan mek Cristiano Ronaldo ringawt pawh hian an ram tan hian hat-trick tum 10 zet a siam tawh. Mahse, Ronaldo awpna hnuaiah hian Portugal hi an ropui hlei thei tawh lo. Euro-ah khan Round of 16 ah Belgium-in an pet chhuak a nih kha. Nakum World Cup hi an superstar Cristiano Ronaldo hun hnuhnung a ni tawh ngei ang. Chutihrualin, coach Santos-a tan pawh world cup hi Portugal a enkawlna hun hnuhnung a ni bawkin a rinawm. Tunah hian FIFA World Cup qualifying round-ah an group-ah pahnihna an ni mek.

#7 Spain- 1687.66 points
    Hun eng nge maw chen Spain ram football team tlak hniamna dawm kang turin coach Luis Enrique a rawn lang a. Euro 2020 khan Spain hian semi-final an thleng phak piah lamah game hmuhnawm tak an lan tir bawk a ni. 2010 bawr vela an talent ropui tak ang kha an pho chhuak phak leh lek lek tawh a, Enrique-a nau te hi technically leh tactically in thatna an nei a ni. An team zingah hian talent nei tha tak tak Pedri, Gavi leh Ansu Fati te an awm a, an ni pathum chauh pawh hi Spain national team khai ding thei khawpa thiam an ni.

Spain hian UEFA Nations League final lutin France lakah 2-1 in an tlawm hlauh thung. Enrique-a'n team a enkawl dan duh riau club lian tak tak zingah an awm a, mahse Barcelona manager hlui hnuaiah hian Spain national team ten hlawh tlinna chan ngei an tum vangin an chhuah phal rih maiin a rinawm loh.

#6 Argentina- 1738.79 pts
    Messi-a leh player tha tak tak an nei chungin kum rei tak chhung an thawm a reh a, tun nipui lai khan a tawp a tawpah Argentina hian international title la-in Copa America nomawi an chawi ve a nih kha.
    Kha an chakna khan an thiampuipa Lionel Messi a pawh lung damin a awm tir tawh ngeiin a rinawm. Tun hnaia Argentina team-in international trophy an chawi mai thei lo kha ram tan a pawi piah lamah an superstar Messi-a tan a pawi leh zual a, tunah erawh hlawhtlinna leh inrintawkna nen world cup pawh an hmachhawn thei tawh dawn a ni. 
    Argentina hi FIFA World Cup qualifying khelh mekah an group atangin pahnihna an ni mek a, World Cup nopui chawi thei tur a rin team zing ami an ni. 

#5 England- 1750.16 pts
    Gareth Southgate hian England a chet that pui chho hle a, chutihrual erawh chuan trophy lian tham a la chawipui thei loh avang erawh chuan sawi seltu pawh a nei reng thung. England hian Euro 2020 final an lut a, ropui taka khelin penalty-ah Italy lakah an vanduai hlauh a nih kha.        

England hian tunah hian khawvel player tha ber ber an kawl nual a, chung zingah chuan Harry Kane, Harry Maguire leh Raheem Sterling te hi hming langsar pawl an ni. Anni bakah hian Jack Grealish, Jadon Sancho, Marcus Rashford leh Bukayo Saka te an la kawl bawk a, mahni tawka talent nei tha tak vek an nih vangin team innghahna tham an tling. Southgate-a team thlan dan leh tlar hnung a rem dan erawhin sawisel a hlawh ve viau thin. England hi FIFA World Cup qualifying khelh mekah an group hmahruaitu an ni.

#4 Italy- 1750.52 pts
    Football ram ropui thin Italy hian hnanni lawk khan Euro 2020 nopui an chawi a, tin UEFA Nations League-ah semi-final an thleng bawk a nih kha. An coach Roberto Mancini hian 2018 FIFA World Cup qualify pui zo lo mahse, world cup dawta tournament ber pakhat Euro a chawipui leh thei a, tunah rih chuan ban thiang lo tluk a ni rih. Mancini hian kum lama naupang zawk te leh player tawn hriat ngah tawh zwk te a rem khawm thiam hle, chung a chi nung tuh hmang chuan Italy national team hian par a chhuang a tih theih awm e. 

World Cup qualifying khelh meka an group-a hmahruaitu Italy hi Euro an chawi theih ringtu an tam lo chungin an chawi a, nakum Qatar World Cup pawh hi an chawi leh mai lovang tih sawi lawk ngam a ni ta lo. 

#3 France- 1779.24 points
    Euro en te chuan France national team dinhmun leh an player neih that dan chu in hre vek awm e. 

France manager a nih hnua tournament lian a khelh puina hmasa berah Didier Deschamps a che tha tawk lova, champion thei hial tura ngaih team enkawlin Euro, Round of 16-ah a tlak pui a nih kha. An player te enin France team hi international level-ah pawh champion thei tura mawi an ni a, World Cup lo awm tur hian an dinhmun dik tak a tifiah ngeiin a rinawm. 

Hmanni lawkah Spain hnehin UEFA Nations League-ah an champion a, nakum world cup chawi tura rinkai ber pakhat chu France hi an ni. 

#2 Brazil- 1820.36 points
    Brazil hian Copa America 2021 final-ah Argentina an hneh lova, he inkhelh tum hian hming langsar leh an chotuah nasatber chu Neymar leh Lionel Messi te an ni a, Brazil mualphona aiin Messi ropuina in football ram pahnih te final inkhel hi a hliah khuh mah zawk.

Khawvel forward tha ber pawl Neymar chuan nakum World Cup hi an ram tana a khelh tawpna tur niin a sawi a, chuvangin World Cup chawi ngeia ram tana football chawlhsan a duh ngeiin a rinawm. Brazil tan hian goal 70 chuang thun thei mi pahnih chiah an la awm a chung mite chu Pele (77) leh Neymar (70) te an ni. Brazil manager Tite hi World Cup chawi turin a tha tawk em tih chu nakum lamah a hriat angchu. 

#1 Belgium- 1832.33 pts
    Player chungchuang bik tak sawi tur awm si lo hian Belgium hian FIFA ranking pakhatna a luah rei ta khawp mai. International football lamah an chetha tih chu hai rual a ni lo, mahse trophy lian tham an chawi thei lah a nibawk si lo. 

Belgium team hi an inkhairual em vangin Golden Generation ti hial a sawi thin an ni. Chuti chung chuan, Euro-ah quarter-final an thleng hram a, UEFA Nations League-ah lah champion zo lovin semi-final ah an tla bawk. Nakum World Cup hi an chawi lo leh a nih ngatchuan trophy ropui chawi lovin an Golden Generation hi a liam mai tura ngai an tam tawh hle. Jan Vertonghen leh Toby Alderweireld ten an hun tawp lam an hmang mek tawh a, Eden Hazard-a lah a inhliam deuh reng bawk a, Romelu Lukaku-a pawh a vanglaini te a chuai tan mek a ni bawk si.     Nakum World Cup hi Belgium Golden Generation tana an tournament hnu hnung a ni tawh maithei a ni. Hei vang hian an star player  Romelu Lukaku, Kevin De Bruyne leh Thibaut Courtois te tan chuan pressure a sang viauin a rinawm.