European champion Italy team chu 2022 World Cup-ah kan hmu ve dawn ta lo. Palermo-a North Macedonia nen play-off an khelhah sikhat faiin an tlawm a, hetia world cup khel thei lo tura an tlawm mai hi Italy player te hian hrehawm an ti tih khelmual chhunga an awm lai hian an cheziaah a hriat theih. Thenkhat phei chuan hnukulh teuhin khelmual an chhuahsan a ni. 

World ranking-a 6-na leh World Cup tum li chawi tawh Italy lam hian inkhelh hi an thunun zawk a, 65% lai ball an chang chungin an duh leh mamawh ber goal erawh an khung thei lo. Ball 35% chauh chang chunga tlawm tum lo North Mecedonia hian huaisen takin counter-attack hmangin an bei let thin a, a tawpah an hlawhtling. 

Hun pangai minute 90 a nih hnu pawhin chak zawk an la awm lo. Hun a tawp tep a, a pet goal zawk zawk team-in play-off final an lut mai dawna a lan laiin minute 92 (injury-time)-ah Aleksandar Trajkovski chuan ball changin Italy goal lamah a khalh phei a, an chakna goal hlu tak a khung. Italy lam tan rul let turin hun a awm tawh lo. 

Tihian a zawnin World Cup ti World Cup tu Italy team te chu kumin kum tawp a khelh tur Qatar World Cup-ah an hmel kan hmu ve dawn ta lo. Mizo nu ho tan em em Azzurri te chu football khawmpui lian berah hian kum 12 chhung chu an hmel hmuh tur an awm dawn ta lo a ni. 

World ranking-a 67-na North Mecedonia te hian Turkey hnehtu Portugal nen World Cup khel tur an zawng leh ang.

Italy legend Giorgio Chiellini chuan,"Kan chaklo hi team te hian an tuar tak zet a, an ruak huai a hei hian hun eng emaw chen chu a awh ngei ang. Inkhelhah khan kan vanduai hrim hrim a ni. Chance vawi tam kan insiam a, vanduaithlak takin goal kan khung thei lo. Ram tana theih tawp chhuahtu kan team te hi kan chhuang takzet a ni," a ti.