ZALEN, Feb. 04, 2025: Mizoram Football Association (MFA) chuan referee lama tuite tan All India Football Federation (AIFF) Referee Development Course a buatsaih dawn a, Mizoram football chawikanna tura hma lakna pawimawhah a ngai.

MFA Referee Committee Chairman Lalrawngbawla chuan, “Tual chhung inkhelah thutlukna avangin inhnialna a awm thin a, kan inkhelin hma a sawna thutlukna dik siam turin technical official tha kan neih belh zel a pawimawh.

“Khairuala Mizoram football-in hma a sawn theih referee tha ni turin lehkha thiam leh he lama tui mi, tih tak zeta ti duh leh thlen san duh tan kawng a inhawng hle a ni. National, international thlenga ham thei referee neih theih hi kan duh dan a ni a, referee tha kan neih tam chuan tual chhung inkhel pawhin hma a sawn ngei dawn a ni,” a ti.

AIFF Referee Development Course hi February 18-20, 2025 chhungin Chite Ground, Aizawlah buatsaih a ni dawn a, India rama referee instructor tha ber pawl, AIFF Regional Referee Officer Joy Chandra chuan a zirtir dawn a ni.

Mi 40 vel lak an ni dawn a, Mizoram hmun hrang hranga a duh apiang tan tih theih a ni. MFA hruaitute leh district hrang hranga FA hruaitute hnenah ngaihven theih a ni a, registration fee Rs 100 bak a hranpaa pawisa chawi tur a awm lo.

Referee ni thar duhte tan buatsaih a nih rualin a ni sa tawh, Referee Identification Number (RIN) nei sa, level sang zawka inhlankai duhte leh national referee exam turte tan tel theih a ni bawk.

AIFF hnuaiah referee level hrang pariat a awm a, tuna zir tharte hian course an zo a nih chuan level 8-ah an lut nghal ang. Level 5 chin leh a chung lamte national referee an ni a, tuna ham lai mek atangin national refree ni thei Mizo pathum (hmeichhia pahnih leh mipa pakhat) chauh an awm a ni.