Football khelh mai hi thil harsa a ni lo. Mahse, khua leh veng khat aiawh phak tur pawhin thiam ve hret chu a ngai thin. State aiawh tur phei chuan taimakna leh talent neih tel ve a ngai. Ram aiawh leh club thaa khel tur phei chuan beih fe a ngai thin. Khawvel-a footballer mimal chawimawina sang ber Ballon d’Or 7 lai dawng tur phei chuan mi chungchuang bik nih a ngai. Chutiang mi, midang aia Messi-a ropui bikna hi han chhiar ve teh leh.

Season khat chhunga mimal chawimawina ngaihhlut 4 dawng thei footballer awmchhun: 
    
Kum 2009-10 season khan Argentine star hian Ballon d’Or, Golden Boot, FIFA World Player leh Pichichi Trophy te a dawng kim vek thei. Season khat huam chhunga heng award 4 dawng thei chu Leo Messi chauh hi an la ni. Hemi tum season hian Lionel Messi hian league match 35 a khelh-ah goal 34 a thun thei a ni. UEFA Champions League matche 11-ah goal 8 a thun bawk. 

Hemi kum hian Arsenal nen Champions League-ah in tumin goal 4 a khung a, Arsenal coach, Arsene Wenger chuan, "Messi hi khawvel player tha ber a ni, PlayStation-a player ang mai niin kan tihsual apiang remchangah alo hmang thei zel," tiin a fak.

Club khat tana goal thun tam ber
    
Lionel Messi hian club khat tana goal thun tam ber nihna hauhtu Brazilian legend Pele-a record ropui lo siam tawh chu nikum khan a khum. Hemi lawmna denchhen hian Budweiser te chuan Lionel Messi-a ball pet chhuah tawhtu goalkeeper zawng zawng hnenah beer bottle an thawn vek nghe nghe. 
    
Leo Messi hian Barcelona tan official-in goal 644  a thun a, chu chu world record a ni. Legend Pele khan Santos club tan game 672-ah goal 643 a thun a ni. Messi hian season lian ta khan goal thun belh nualin game 778-ah goal 672 a nei a ni. Mahse, Messi hi Paris Saint-Germain lamah a luh tak avangin goal dang a neih belh thei tawh dawn lo niin a lang.

 European Golden Boot dawng tam ber
    
Lionel Messi hi goal thun thei satliah a nilo tih chu tlang hriat a ni. Goal net zar puar pawp tura a chhuih luh theihna kawngah hian a chevel hi a hmuhnawm em em a, defender palian tak tak kara a ball khalh kual vel dan leh mi a pek dawna a mit fing lutuk te hian midanglam bik leh mi chunga leng a nih zia a lantir fo awm e. Amah Leo Messi hi, league lian player zinga goal khung zawn rei ber hauhtu a ni mek bawk. 
    
2012/13 season khan Messi hian game 21 chhung zet chu chawl lovin goal a khung a, mimal chu sawi loh hetianga a zawna game 21 ngawt thun thei hi La Liga team zingah an awm lo hrim hrim. Sawi vak ngaihna pawh a awm lo, a ropui a ni tawp mai. 
    
European Golden Boot hi kum tin European top division team atanga goal thun tam ber player hnena hlan thin a ni a, chutiang chawimawina ropui chu Lionel Messi hian tum ruk ngawt a dawng tawh. (2009-10, 2011-12, 2012-13, 2016-17, 2017-18 leh 2018-19 season). Season dang zawng aiin 2011-12 season khan a che ropui ber a, competition hrang hrangah goal 73 zet thunin midang goal thun tur 19 a nei bawk. 

Kum khat chhunga goal thun tam ber
    
Lionel Messi hian German player ropui Gerd Muller-a record siam khum a nei nual a, hei pawh hi chung zing ami chu a ni. Barcelona player hlui hian kum 2012 khan club leh ram tan goal 91 zet thunin Gerd Muller-a record ding lai a khum chiang hle. 2012 hian Lionel Messi hian mimalin goal 91 a thun a, hemi kum hian Manchester United team chuan goal 85 chiah an thun a, PSG-in goal 86, Chelsea-in goal 87 leh Dortmund player zawng zawngin goal 88 an thun thei hram a ni. Goal 91 thun tur hian game 69 chiah a mawmawh bawk.
    
German legend Gerd Muller hian 1972 khan kum khat chhungin goal 85 a thun a, hemi kum hian West Germany chu Euro a chawipui bawk. A record ropui chu kum 30 hnuah Lionel Messi chuan a rawn khum ta a ni. Messi record hi khum chu a harsa ve tawh viauin a rinawm.

Ballon d’Or dawng hnem ber
    
Ballon d’Or hi footballer te tana mimal chawimawina sang bera ngaih a ni. He chawimawina hlu leh ropui tak hi kum 15 chhung zet chu Lionel Messi leh Cristiano Ronaldo te pahnihin an insem deuh chawt a. Heng superstar pahnih hi tunge ropui zawk tih khaikhin an ni fo bawk. Anni pahnih ter phak tunlai player zingah an awm lo. 
        
Ballon D’or tum 6 (2009, 2010, 2011, 2012, 2015 leh 2019) dawngtu Messi a football ngainatu tam tak chuan Greatest of all time (GOAT) ah an ngai. Mual chhunga a elpui ber Ronaldo hian panga a dawng ve tawh a. Anni pahnih tih loh he chawimawina tum thum dawng thei player dang an la awm lo. 
    
PSG star hi he chawimawina dawng thei turin tum 13 zet thlan alo ni tawh bawk a, hetiang a tam nominee hmu thei player dang chu Ronaldo chiah a awm.