Professional footballer zingah hian ke pahniha hmang kawp thiam an tam hle a, chung zingah chuan ding lam hmang thiam an tam zawk a, vei khawr erawh an tam lo nain an langsar viau thung. 

Footballer zingah khawvel leh Mizoram huapah pawh player vei khawr lar tak tak an awm tawh thin a, tunlai footballer zingah pawh hian vei khawr ropui leh hming thang tak tak an awm chungin, thenkhat phei chu vei khawr an ni tih pawh i hre loh te pawh an ni maithei thung.  Thenkhat phei chu an thiamin an hming thang a ni mai lova, an team hlawhtlinna tura kawng sat engtu pawimawh tak an ni. Sportskeeda ten vei khawr player hlu zual panga an thlan chhuah hi han thlir ve chhin la, i pawm zawng nimaw. 

#5 Lionel Messi (Paris Saint-Germain) - €80 million

Mi tam zawkin tunlai khawvel player tha ber an tih Lionel Messi hi, footballer vei khawr zinga hlu ber pangana a ni mek a, a ke vei lama a pet goal kan hmuh fo thawh thin avangin min thawng lutukin a rinawm lova, pangana a luah phak tawk hian mak tih a hlawh zawk hial mai thei. 

Messi hian club tan a career-ah goal 672 zet a thun tawh a, a pet goal zawng zawng atanga chhut a, 60 per cent (goal 414) hi a ke vei lam hmanga a chhuih luh ngat an ni. Heng a goal thun zingah hian free-kick mawi leh nalh tak tak a tel. 

Kum 34-na hmang mek, tum 6 Ballon d'Or  chawi tawh Messi hian mimal chawimawina leh club tan trophy ropui a chawi kim thawkhat a, a goal thun thei lutuk hi a hming thanpui ber pakhat a ni. A career-ah trophy 36 zet a chawi tawh a, chung zinga 10 chu La Liga title niin pali chu Champions League nomawi a ni. Player ropui Messi hian captain nichungin kumin hian a international trophy vawi khatna Copa America nomawi chu a chawi ve thei chiah a, nakum world cup hi chawi thei tak maw!

Messi hian tun nipui lai khan Barcelona atangin PSG a zawm a, game thum lai a khelh hnu pawhin a club tan goal a thun thei mai lo. Mahse, player ropui chu a pilbo reng thiang lo, tournament pawimawh tak Champions League-a game pawimawh Manchester City nen an khelh tumin goal a thun ve ta. 

#4 Phil Foden (Manchester City) - €80 million

Manchester City tana khel mek Phil Foden hi tunlai footballer tuai thar zingah chuan khawvel player tha ber pawl a ni mek. Manchester City academy atanga inzir chhuak Foden hian a club tan 2017-18 season khan first-team a zawm ve tan chiah.

Kum 21-na hmang mek, vei khawr hian football career a la hman tam loh vangin chanchin ropui sawi tur a ngah rih lo. Season hnih chhung lek hun a hman chhung hian Pep Guardiola duhsakna a chang cho zel a, ropui taka par chhuak tur a beisei a ni. Tunah chuan vei khawr technician ropui, Foden hi a passing tha lutuk leh a goal mawi tak te vangin City team zingah a hming hi a langsar tawh hle a, Premier League leh Carabao Cup-a an hlawhtlinnaah pawh player pawimawh tak a ni chho mek. Hetia hming a chher tur hian a ke vei lam a chhawr tang kai em em a ni. City tana goal 32 a thun tawh zinga goal 22 hi a ke vei lam hmanga a thun a ni. Season liam ta khan Foden hian, Cityzen tan goal 16 thunin assist 10 neiin tun season hian nikum aia a chet that ngei beisei a ni. 

#3 Romelu Lukaku (Chelsea) - €100 million

Chelsea forward thar, Romelu Lukaku hi vei khawr footballer tha ber pathumna niin kum eng emaw chhung chu a club hlui tan ropui takin alo inlan tawh thin a, tunah pawh hian Europe-a striker tha ber pakhat a ni mek. 

Manchester United-a a khelh hnuah Serie A club Inter Milan lamah kum 2019 khan a lut a, Antonio Conte hnuaiah a khel tha hle a, Nerazzurri tan game 95 inlanin goal 64 leh assist 16 a nei. Season liam ta khan goal 24 leh assist 10 a nei a, a goal leh assist te  hi kum 11 chhunga Inter Milan-in Serie A title an lak theih na turin a tangkai em em. 

Vanduaithlak takin Inter hian sum pai lamah harsatna namen lo tawk chhovin an star player Lukaku hi an hralh alo ngai ta. Inter tlak chhiatna chu Premier League club Chelsea tan lawmnaah lo changin an la lut a, season tan tirh atangin Stamford Bridge-ah hian che tha nghalin Blues tana game riat a inlanah goal 4 a khung leh der tawh. 

Lukaku hi vei khawr mah nise, a ke ding lam hi a hmang thiam tel a, chuvangin a goal thun zawng zawng 33% chauh hi a ke vei lam hmanga a thun a ni. A goal thun dang hi a ke ding lam hmanga a thun vek erawh a ni lova, kum 28 mi hian a lu hmangin a tauh lut tam em em a ni. A ke vei lam hmang hian goal 57 thun tawhin, a ke ding lamin 31 a thun a, a lu hmangin tum 23 zet a tauh lut tawh a ni. 

#2 Mohamed Salah (Liverpool) - €100 million

Tun hnaia Liverpool par chhuah puitu Mohamed Salah hi tun hnai chhoah chuan Premier League player tha ber zing a mi a ni. Egyptian winger hian kum 2017-a Liverpool a zawm hnu hian hmasawnna tam tak a nei a, Premier League-a season a hmanna hmasa berah goal 32 thunin Golden Boot a dawng thei nghal. 

Kum 29 mi hi Jurgen Klopp-a hnuaia player pawimawh niin Reds ten trophy ropui pathum UEFA Champions League leh Premier League te an chawina kawnga player thawhhlawk ber pakhata ni. Salah hian a career-ah goal 208 thun tawhin chung zinga goal 132 zet chu a ke vei lam hmanga a thun a ni. Salah hian 2020-21 season kha a hmang tha ang reng hle a, game 8 lekah goal riat leh assist pahnih a nei thei a ni. 

#1 Erling Haaland (Borussia Dortmund) - €130 million

Kum 2019 maia hming rawn chher tan a ni naa, tunah chuan khawvel striker hlauhawm ber pakhat a ni der tawh. Haaland hi Champions League lama a chet that theih em vangin club lian zawk ten an ngaihven nasa hle a, January 2020 khan Borussia Dortmund lama a luh hnu phei chuan, amah pawhin nasa takin hma a sawn chho a, tunah chuan Bundesliga-a striker hlauhawm ber pakhat a ni der tawh. 

Game 67 a khelhah kum 21 mi hian goal 68 zet a khung thei a, assist 19 lai a nei bawk. A game a khelh a pianga goal thun ang a ni. Haaland hian Champions League bikah game 16 lekah goal 20 thunin player goal 20 thun thei rang ber record a siam. 

Haaland-a goal tam zawk hi, a ke vei lam hmanga a goal thun niin a career-a goal 117 a thun zinga 50% chu a ke vei lam hmanga a thun a ni. Tun season-ah Haaland hian game riat lekah goal 11 a thun leh der tawh a, assist tum li a nei tawh bawk.