Aizawl; Aizawl District Anti Tobacco Squad leh Bawng kawn Police tang kawp chuan nimin zing khan Bawngkawn leh Thuampui-ah COTPA dan bawh chhia a zawrh Foreign Cigarette thahnem tak an man. Anti Tobacco Squad ten Foreign Cigarette an man te hi Cigarette kawm a vaihlo in hriselna a khawih chhiat theih dan (Vaukhanna thu) a lem leh a thu tarlan awmlo te an ni a. Cigarette and Other Tobacco Product Acts 2003 section 7 bawhchhia man te hi Farstar Carton 80, Winbody 62 leh Hummer carton 14 a ni a, tualchhung an hralh chhuahna ang chuan Rs 40,000/- man bawr vel a ni. Heng an thil man te hi ATS chuan a neitu te hmuh lai ngeiin fel taka pack-in hriatpuitu mi pahnihin hming an ziah hnan a, an chungthu ngaihtuah turin court lamah thawn an ni ang. COTPA danah chuan Vaihlo hralh chhuahna reng rengah 40 % khuhin vaihlo in hriselna a khawih chhiat theih dan (Vaukhanna thu) a lem leh a thu tarlan tur a ni a, he dan bawhchhia a Cigarette zuar lui te chu COTPA 2003 section 20 na hmangin Rs.1000/- chawitir emaw a pahnihin hrem theih an ni a, an tihsual vawi hnihna ah phei chuan kum 2 lungin tan emaw, Rs 3000 chawitir emaw a pahnih pawhin hrem theih an ni bawk a ni. ATS squad leader ZT Vawra, District Coordinator chuan “Dan lova Vaihlo leh a kaihnawih sumdawnna hi tihrem tumin Mizoram State Tobacco Control Society leh a thawhpui pawl hrang hrang ten chuan kum 2009 atang khan hma kan la tan a, sumdawnna nei tute pawh workshop neihpui an nih bakah a hmun ah anmahni ngei hrilhfiahin chanchinbu leh local cable TV ah te kan ti chhuak tawh thin a. Kum 5 chhung awareness kalpui a ni tawh a, chak zawka hmala zel turin tunah hian a taka kan chet chhuah a hun tawh a ni” a ti. Aizawl District Anti Tobacco Squad te chuan chak taka hma la in Aizawla wholeseller lian zual te atang in hetiang dan bawhchhia te hi an man mek a, dawr te neitu te pawh Foreign cigarette (Pictorial Health warning) chuang lo te chu zuar tawh lo turin an hriattir nghal zel a ni.