Boxing legend George Foreman chuan khawvel heavyweight boxer tha panga a thlan chhuah zingah Muhammad Ali leh Lennox Lewis te a telh laiin champion hlui leh rothap ‘Kapathir’ an tih mai Iron Mike Tyson erawh a telh tlat lo thung.
   

Kum 73 mi Foreman chuan Joe Louis chu sport history-a fighter ropui ber tiin a sawi a, Louis hi a hming lema ‘Brown Bomber’ an tih hial khawp a hnek na kha a ni ve a, kum 1937 daih tawh khan world champion niin weight hrang hrangah kum 10 chuang ro a rel thei a ni. 
   

Alabama lam chhuak hian a hun chhungin world champion ni tawh mi panga zet a tuk dawl thei a, inhnek tum 25 zetah a title a humhim thei bawk. Chutiang khawpa boxer ropui leh fighter tha chu boxer zingah Foreman an la piangin a hre lo. 
   

Khawvel boxer zinga  greatest heavyweight of all time tunge tia zawhna chu Twitter hmanga chhangin, “Joe Louis hi kum 11 chhung zet world a ni thei a, amah hi  The greatest of all time, chu a ni e” a ti. Kum 1951 khan Joe Louis hi Rocky Marciano chuan New York-ah a hneh a, hemi hnu hian Louis hian boxing a chawlhsan zui nghal. 
   

Kum 1986 khan Tyson hi heavyweight champion naupang ber rawn niin khawvel a barakhaih a, kum 20 mi lek Tyson chuan Trevor Berbick-a chu hun reilo te chhungin a rawn hnek thal tawp a, champion kawnghren a hreng thei a ni. Hetiang khawpa boxer ropui leh huhang ngah hi Foreman erawh chuan boxer ropuiah a chhiar ve tlat lo thung a, Logan Paul-a te ho nena inhnekna ruahman tawk vel tur lekah a ruat a ni. Fan ho henah “Tyson-a hi ka duh thlan 5 zingah a tel lo, 10 thlang ila chuan a tel ve mahna,” a ti duh lek. 
   

Foreman hian Sullivan chu pathumnaah thlangin Ali chu palinaah a dah thung. The Greatest an tih hial Ali hi mi tam tak chuan a vanglai chuan boxer ropui ber niah an ngai. Ali hian kum 1974, October thla khan heavyweight champion ni turin amah Foreman hi a knockout tawh a ni. 
   

Foreman hian boxer tha a thlan chhuah zinga panganaah Lennox  Lewis a thlang chhuak bawk.