DOWNLOAD OUR APP

Read latest news on your phone
app-store

Forensic web lamah

Aug 06, 2016

Forensic web lamah

Mizoram Sorkarin Department hrang hrang leh an hnuaia Office te Website nei vek tura a tih angin Office tam zawk chuan anmahni pualin Website an nei deuh vek tawh a, chanchinbumi leh mipui tan pawh office a kal chilh kher lovin awlsam takin thil a hriat zung zung theih ta. Office then-khatin an Website an vil ngun hle laiin Office thenkhat chuan an Website an hlui-hlawn a ni ngawt mai a, a zia lo hle. Mizoram sawrkar hnuaia Office hrang hrang zingah Forensic Science Laboratory hi Website vil hneh leh enkawl tha ber an ni hial awm e. Forensic Science Laboratory thawktute hnen atanga Zalen palai thudawn danin an website-ah hian an hnathawh leh kalphung bakah mipui tana hriat tur pawi-mawh dang – Citizens charter, Division hrang hrang awmte, pawikhawih-na hmuna Forensic Team koh dan kal-hmang leh thil dang pawimawh tak tak tarlan a ni. Forensic Science Laboratory hi kumin April ni 8-a Home Minister, R.Lalzirliana’n Official-a a hawn hma, nikum lamah khan Website tha 2-na lawmman an lo dawng tawh a, kumin lamah pawh tangkai lehzuala hman anih theih nan nasa zawk a tichangtlungin nitinin an Case khawih an update thin. Forensic Science Laboratory, Director H.Sangch-ungnunga chuan an webiste-ah nitina Case exam an update thin thu sawiin, “Ni tina case exam update thin hi India ram Forensic Laboratory dangah hmuhtur a awm lova, khawvel hmun dangah pawh a awm lo maithei a ni,” a ti bawk. Zalen palai zawhna chhangin FSL Director chuan sawr-karin Website-a tarlan tur a tih zawng zawng an tarlan bakah anmahni inhuamna angin an Case khawih din-hmun an tarlan thin thu sawiin, “Case kan dawn ni atangin kan exam mek leh Case kan thawn chhuah ni thlengin website ah hian kan update thin a ni,” a ti a. Website-ah an hnathawte an update thin chu Police leh Excise Department ten ‘password’ pek bik hmangin an Case dinhmun an lo en thin thu a sawi bawk. H.Sangchungnunga chuan website an hman tangkai duh dan tur anga an sawi anga a thlawna siamsaktu ICT Department chungah an lawm thu sawiin, “A tirah chuan kan huphurh hle a, tih theih hram kan duh laiin staff kan tlem bawk si a, chutihrualin a tangkai dan tur kan hre bawk si, huphurh tak chungin hma kan la a. ICT Department tanpuina avangin tunah chuan a tira kan huphurh tehlul nen tha takin kan kalpui ve thei reng mai a, kan lawm hle a ni,” a ti. Forensic Science Laboratory website https://forensic.mizoram.gov.in hi mipuite pawhin engtiklai pawhin an hriat duh apiang te chu an Department kaihhnawih thil a en thei reng a. An website ah hian Case neitu lam Excise Department emaw Police lam emaw chuan ‘online’-in an Case chhuilai dinhmun te chu Website atang hian an password hmangin awlsam takin an en thei tawh a ni.
Share now