Aizawl: Nimin zing khan Forest Protection Division leh Association for Environmental Preservation (ASEP) tangkawp chuan Aizawl khawpui chhung bazar hmun hrang hrangte tlawh kualin, ramsa rep leh phal loh thil dangte zuar an awm leh awm loh check runpui an nei a, phal loh thilzuar hmuh leh man an nei lo. Forest thawktute leh ASEP hi group 4 ah inthenin group 1 ten Thakthing, Khatla & Treasury Square bazar te an fang a, group 2 ten Bazarpui leh a chhehvel hmun thenkhat an fang a, group 3 ten Vaivakawn leh Chanmari bazar fangin, group 4 na-in Zemabawk, Thuampui & Bawngkawn te an fang kual a ni. Protection DFO Lalduhthlana chuan, “Aizawl bazar leh office hrang hrangah te ramsa rep zuar an awm thu report kan dawng thin a. Hemi avang hian ASEP te thawhpuiah sawmin hetiang hun hi kan buatsaih a, man kan nei ta lo hi a lawmawm hle-ah kan ngai a. Mahse a ruka zuar leh sawrkar office lama zuar thinte pawh theih ang angin dapchhuah hna thawh zel kan tum dawn a ni,” a ti a. Hetiang phal loh thilzuar hmu leh hria chu an hnena hriattir zel turin mipuite a ngen bawk. ASEP President K. Lalmuansanga pawhin, “Protection Division lamte nena thawhhona tha tak neia hun kan hmang thei hi lawmawm kan ti a. Tunah man nei lo mah ila, hei hian dan bawhchhia leh thil dik lo titute a tiralkhel hrim hrim pawh hi a lawmawm a, awareness tha tak a ni bawk a. Hei hian rah tha a chhuah zel ka beisei tlat a ni,” a ti bawk. Hun remchang a awm dan ang zelin Protection Division leh ASEP tangkawp hian hetianga surprise checking hi neih zauh zauh an tum a ni.