ZALEN January 10, 2026: Foundation For Drug-Free Mizoram chuan an pawl inkhawmpui lian High Council Vawi 5-na chu Synod Conference Center-ah an hmang a. Agriculture Minister PC Vanlalruata chuan khuallian niin a hmanpui.

Khuallian PC Vanlalruata chuan Ruihhlo hian hnam nunphung a tichhia tih sawiin; Mizoramin a mamawh tak pawl a ding chu lawmawm a tih thu a sawi a. Khualzahawm Rita-a pawhin ruihhlo hnam hmelma laka fihlim tura zirtirna chuan rah tha a chhuah dawn a ti.

He pawl dintu leh an President Vee Mathara leh midangten thu an sawi a, rorelna nei zuiin; resolution siamin; ruihhlo do kawnga Chief Minister Lalduhoma kaihhruai Sorkar an ring tawk tih an sawi a, an pawl chuan kum 100 lo awm leh turah Mizorama khua zawng zawng tlawhchhuah vek an tum. 

Kum 2026 atanga 2028 chhunga pawl hruaitu thlanna M.J.A kaihhruaina in Inthlanna an nei a, mi pasarih - V. Lalnunthara, C. Vanlalsanga, Aldrin Zomuanpuia, Peter Lalzawmliana, Remliani Chawngthu, K. Zoremsanga leh H. Lalrinliana te an thlang. Chanvo an insiamrem leh dawn a ni. 

He pawl hi kum 7 a upa ni tawhin; member 1,400 an nei mek a. An pawl rawngbawlna kaltlangin tleirawl mi 25,400 te ruihhlo laka fihlim turin an lo intiam tawh a ni. High Council-ah hian palai mi 80 an kalkhawm.