Tun hnai hian Frenkie de Jong hi Barcelona-a a dinhmunah a lungawi lo hle nia sawi a ni a, tun season-ah Blaugrana tana a beisei angin game a khel tam lo.

De Jong-a chung changah hian tun nipui chhung zawng khan transfer thuthang a awm a, mahse a tak ram a thleng ngai lo a, a tawpah chuan a club ngaiah a awm ta nge nge.

Tunah chuan thil awmdan a danglam leh tawh avangin club dangte pawh awlsam zawka Dutchman la lut turin kawng an hawn sakin a rinawm. Chuti a nih chuan, eng club-ah nge De Jong hi a luh tak ang?

Manchester United 
Amah duhtu langsar tak chu Manchester United a ni. Tun nipui chhung khan kar 17 chhung zet De Jong hi lak tumin an um a, mahse Old Trafford-ah an hruai lut thei lo.

De Jong hi transfer window-ah Erik ten Hag-a’n a ngaih pawimawh ber a ni a, Manchester United-a a midfield tihchangtlunna tur ṭha ber niin a ngai.

Hun remchang a awm a nih chuan, Ten Hag leh Manchester United te chu De Jong  la tur hian market-ah an kir leh ngeiin a rinawm. Tun ṭumah hian an lei tawp a nih loh pawhin loan hmangin a hawh maithei bawk. 

Chelsea 
Manchester United tih lovah Chelsea hi kumin nipui bazar chhunga De Jong lei duhtu club dang an ni a, an inhnim hnai hman hle niin an sawi bawk. 

An midfield thuam chak a ngai a, Jorginho leh N’Golo Kante hmalam hun tur a la chiang lo bawk nen  transfer window lo awm turah chuan De Jong hi an chuh chak viau maithei. 

Blues hian Todd Boehly hnuaiah pawisa hman an hreh lutuk lo va, chuvangin an player duh tak De Jong lakluh nan chuan sum an seng tam hreh lo maithei. 

Juventus
Calciomercato-in a tarlan danin Juventus hi Dutch midfielder la lut tura intlansiak naa lut thar ber an ni a, anni hian a ruk takin lakluh tumin an thlem nasa viau mai thei a ni.

De Jong hi central midfield role atana lakluh an tum zingah chuan a ṭha ber niin an hria a, a duhzawng an pek theih dawn phawt chuan a lut thut mai thei. 

A man hi an tan chuan phurrit a ni maithei a, an elpui dangte angin sum theh chhuah tur tam an niin a rinawm loh bawk. 

Bayern Munich
Bayern Munich hi transfer hun chhunga Dutchman nena sawizawm club dang an ni a, lakluh hun a lo thlen hunah lakluh tum zingah an intlar ve ngeiin a rinawm. 

Nipui chhungin sum an hmang ve nual a, hun an hmang nasa hle a, Ajax star talent nei tha tak tak Matthijs de Ligt, Ryan Gravenberch, Noussair Mazraoui leh midangte an lalut tawh bawk a ni.

De Jong-a pawh he club-ah hi chuan a mikhual lutuk lo maithei a, Champions League lamah pawh tha takin a chet nghal maitheih a rinawm.