Proreal chuan Mizo bakah hmarchak state danga lemchan thiam leh South Indian lemchan thiam thlenga an inlanna tur film an buaipui mek a, an director chu Drew Pachuau a ni. A changtu zingah Papuia Pachuau a tel bawk. 

He film hi 'Friends From Mini Hotel' tih a ni a, shooting pawh an tan der tawh. Shooting hi Shillong-ah neih niin, Mizoram atanga kalte hian August 12, 2023 khan Aizawl an chhuahsan a ni. 'Friends From Mini Hotel' ah hian film star thahnem tak an inlan dawn a, hmun hrang hrang atangin an fuankhawm dawn. 

Mizoram atangin tute nge kal?
He film-a inlan tur hian Mizo thalai eng emaw zat an chhuk a, an director ber pawh Mizo a nih avangin an tlangnel hle ang. Mizo Film Award 2021 'Best Actor' Papuia Pachuau chu kal zingah hian a tel a, Vanlallawmawmi (Vli) pawh a kal. Vli hi 'Mimi' film-ah khan a changtunu a ni a, a hmelthat bakah a chan thiam em avangin film industry lamah kan hmu chho zel a nih pawhin a mak lo ang. Anni bakah hian 'Pa Hausa' film-a chang thiam zet mai Joe Pachuau a tel cheu bawk. 

Hmarchhak atangin
He film-ah hian hmarchhak state hrang hrang atangin inlan tur an awm nual. Mizoram bakah hian - Meghalaya, Arunachal Pradesh leh Nagaland atangte pawhin lead actor tur an awm dawn a ni. Hei mai hi a la ni lo - South Indian lemchan thiam pawh Mizo film director hnuiah hian an chang dawn cheu bawk. 

Samuel L. Pachuau
'Friends From Mini Hotel' scriptwriter hi In-House Production film hrang hrang ziaktu Samuel L. Pachuau a ni bawk a, a hmuhnawm leh beisei ang. Mizo ten film industry-ah hma kan sawn zel a, kan thlen chin pawh a snag ve hret hret zel e. In-House Production chuan Mizo film star ten thui zawk an thlen theih nan hma lak zel an tum a ni. 

'Friends From Mini Hotel' hi Proreal te produced tur niin, tihchhuah hun tur erawh a la hriat loh. Tlangzarh a nih hnuah Proreal application-ah dah chhuah a ni ang. 

Tawng chi hrang
He film hi a changtute hmun hrang hrang atanga kal khawm an nih ang ngeiin tawng pawh chi hrang hrang hman a ni dawn. English leh Hindi an hmang tlanglawn ber dawn a, an mahni hnam tawng theuh an hmang tel bawk ang - English sub-title a awm dawn. Director Drew Pachuau chuan, "English veka direct ngai pawh hi experience tha tak a ni hrim hrim tawh, hmasawnna kan chhar thar theuhin ka ring," tiin, hamdangte nena an thawkho thei chu an hlawkpui thu a sawi. 
  
Proreal chu eng nge? 
Proreal hi OTT platform a ni a, movie streaming application thang duang chho tak a ni. California, US-ah hmunpui an nei a, khawvel hmun hrang hrangah an inzar phak chak hle - India hmarchhakah pawh bu an rawn khuar der tawh. 

Proreal hi play store leh apple store-ah download theihin a awm a, subscription fee pawh a sang lo hle. Heng laia movie app kan neihte nen a danglamna chu subscription fee chawi tawh chuan app-a movie duh duh a thlawnin a en theih a ni.
Proreal hian In-House te an rawn thawhpui a, tuna an film siam pawh hi share awm loin kalpui dawn a ni.