In House Production kutchhuak 'Friends From Mini Hotel' film chu November 3, 2023 (Zirtawpni) zan khan tlangzarh a ni ta. Hyve City Hall, Aizawl-ah tlangzarh niin, sawm bik ten a hmunah an enho nghal a ni. 

'Friends From Mini Hotel' hi Proreal ten an produce a ni a, Mizoram bakah hmarchak state danga lemchan thiam leh South Indian lemchan thiamte an inlan a ni. An director hi Drew Pachuau a ni a, a changtu zingah Papuia Pachuau a tel bawk. 

Shooting hi Shillong-ah neih niin, Mizoram atanga kalte hian August 12, 2023 khan Aizawl an chhuahsan a, thla hnih vel shooting an zuk nei a ni. An director of photography (DOP) hi Osiama Picture a ni. 

He film-ah hian Mizo Film Award-a 'Best Actor' tum hnih la thei Papuia Pachuau bakah, Vanlallawmawmi (Vli) leh 'Pa Hausa' film-a chang thiam zet mai Joe Pachuau te an inlan. Anni bakah hian hmarchhak state - Meghalaya, Arunachal Pradesh leh Nagaland atangte pawhin inlan an awm a ni. Heng bakah hian South Indian lemchan thiam pawh Mizo film director hnuiah hian a inlan cheu bawk. 

An scriptwriter hi In-House Production film hrang hrang ziaktu Samuel L. Pachuau a ni a, belhchian a dawl leh pek hle. 'Friends From Mini Hotel' hi Proreal application-ah dah chhuah niin, man tlawm takin en theihin a awm a ni.  

Proreal 

Proreal hi OTT platform a ni a, movie streaming application thang duang chho tak a ni. California, US-ah hmunpui an nei a, khawvel hmun hrang hrangah an inzar phak chak hle - India hmarchhakah pawh bu an rawn khuar der tawh. 

Proreal hi play store leh apple store-ah download theihin a awm a, subscription fee pawh a sang lo hle. Subscription fee chawi tawh chuan app-a movie duh duh a thlawnin a en theih a, Mizo film dang pawh en tur a awm chho zelin a rinawm.