Premier League-a inham tan hram hram tum, Leicester City chuan dinhmun tha an luah thei lo zel a. Thawhtanni zanah Fulham-in Craven Cottage-ah goal nga zet lo thunin 5-3 in an hneh a, tla thei dinhmun atangin Foxes-in zuan chhuah an hlat zui mek.

Leicester hi khelh thum an la neih mekah tlahniam thei dinhmuna ding pahnih, Nottingham Forest leh Everton aia an sanna chu goal difference chauh a ni a. Anni pahnih hi an khelh zawh hnu lawka khelh tur nei ve ve an ni a, point thum an hmuh ve ve chuan Foxes lehpelin Leeds United nen a hniam pathum zinga nawr thla theitu tur ve ve an ni.

Thawhtanni zan inkhelah hian vawi thum a zawna chak ni hmel hmu tawh lo, Fulham hian chawlhlawk hmain goal thum ngawt mai an thun hman a. Minute 10-ah Willian chuan free-kick atanga thunin Carlos Vinicius leh Tom Cairney-a ten an thun belh bawk.

Chawlhlawk zawha tan leh atanga minute rukah Cairney chuan an goal lina a thun belh a, Harvey Barnes chuan mikhual tan si khat a sut then a, an beiseina tithar turin penalty an hlawh zui a; mahse, a inhliam a dam hnuah goal thun zawn leh tawh, Jamie Vardy-a’n a hlah ta hlauh.

Willian bawkin thun belhin Fulham-in goal liin hma an hruai nawn leh a, minute 81-ah James Maddison-an penalty an hmuh vawi hnihna chhuih lutin Leicester-in an hnufualna an tizim leh a. Hun tawp dawnah an goal hmahruai thuntu, Barnes chuan thun belh leh mah se a tawk zo ta chuang lo a ni.

Leicester hi khelh hmabak an la neihah a chung lama awm, Champions League khelh ngei tuma inum mek, Liverpool leh Newcastle an la awm a, an tan kawng hi a khirh zual hle tura ngaih a ni.

An tumpui hi tun hnai bikah chuan zuamawm taka dah theih an ni a, an muala an khelh hnuhnung vawi lia vawi thum chak lo an ni a; mahse, an hneh zo ta lo va. An khelh hnuhnung vawi 20 zetah goal chhuah loh an nei ta lo va, Premier League-a goal hum lo zawn rei ber record thar an siam ta bawk.