Aizawl: Nimin khan Mizoram PWD hotute chuan Aizawl Press Club ah chanchinbumite an kawm a, kumin ah fur a nat avanga kawng siamtha mai thei lo an nih thu leh siamtha tura hma an la mek thu an sawi. PWD Engineer in Chief Vanlaltluanga chuan kawng tha neih dawn chuan kawng chhiat hunlai a awm lo thei lo nia sawiin, “Kawng laih a nih a, fur ruahtui tam laia lirthei rit tak takin an zawh reng hi chuan kawng a tha thei lo a ni,” a ti a. Hmannia lirnghing khan lei a ti thawlin ruahtui a tam bawk nen kawng min a tam phah niin a sawi. E-in-C chuan hmun hrang hranga kawngte chu siam zawh a nih hma chuan harsatna eng eng emaw chu a la thleng dawn nia sawiin mipui lam pawh hrethiam turin a ngen tih a sawi a. PWD chuan theihtawp-in hma a la zel niin a sawi bawk. E-in-C chuan kawng chhiat zual bikna chu National Highway an ni tih sawiin National Highway chu sawrkar laipui ta a ni a, Mizoram PWD chu a enkawltu mai niin a sawi a. Kawng chhiat zualna lai Lunglei-Tlabung kawng thawk turin contractor thlan fel a ni tawh a. Tunah repair mek niin a khuar chhe zual lai chu November thla turah hnawh zawh hman tum a ni tih a sawi a. Chhumkhum-Chawngte kawng pawh siamtha thuai turin contractor an hrilh tih a sawi a. Aizawl-Mamit kawng leh KDZKT kawngah te pawh harsatna a awm loh nan hma la turin contractor te an hrilh tih a sawi bawk.