Khawvelah leilung chhiatna chi hrang hrang a awm a, kan awmna ram a zirin kan tawrh dan pawh a inang lo hle. Hmun thenkhat chuan lirnghing an buaipui laiin a thenah thlipui an buaipui a. Kan thenawm state Assam te chuan tuilian an buaipui thung a. Mizoram erawh chuan khuarel chhiatna thleng zingah hman atanga vawiin ni thlengin leimin hi kan buaipui ber a ni awm e.

Kan hriat angin kan chenna hmun hi tlangram a ni a, hmun thenkhata an buaipui lirnghing, tuilian leh thlipui te hi ram dang te ang em em hi chuan harsatna lian lutuk min siam lo a. Chutih lai erawh chuan kumtina kan buaina chu leimin hi a ni.

Leimin chhan hrang hrang a awm thei ang a, ruahsur nasat vang te, thing leh mau chereu nasat vang leh mihringte siamchawp te a ni thei ang. Engpawhnise, leimin hi a tlangpuiin fur ah a thleng deuh ber a, hemi atana lo in venlawk hi kan tih tur a ni.

Hmun hrang hrangah leimin hi awm thin mahse ramhnuaia leimin te chu a hlauhawm nep deuh a. A pawimawh lai ber chu kan chenna vela leimin thleng thin hi a ni a. Heng leimin thleng thin te hi a zavai chuan pumpelh thei lo mah ila a tam zawk hi chu kan fimkhur chuan kan pumpelh thei tih hi chiang takin a lang a ni.

Kan in leh huan vel a min chhan tam ber hi chu tuichhe paihna kan neih mumal loh vang niin a lang. Mizoram chu kan hriat angin ruahtui dawng tam ram a ni a, heng kan ruahtui dawn te hi lo dahkhawl emaw a paihna tha tak siam thei vek ila chuan heti em em hian leimin a tamin a rinawm loh a ni.

Chhungkaw tam ber hian tuihawk leh kan thli paihna hi kan ngai pawimawh lo hle mai a. Kan ram chhung a pelh tawh chuan kan ngaihtha emaw tih mai tur a ni a. Chumai ni lovin kan in laihna leivung te kawrah lo paih mai mai tawk lah bo lo. Hei hi Mangkhawng ah siamin keimahni tan pawh a hlauhawm leh thin tih kan hriat thar a pawimawh hle mai.