ZALEN, Sept., 18, 2024: PWD Minister Vanlalhlana chuan a department chu fur lo thleng tur an inhmakhua a, fur a nat avangin kawngah harsatna a thleng ta tho niin a sawi a, “Duh angin thil a tih zung zung theih loh,” a ti bawk.

Minister hian Nilaini khan Mizoram Truck Drivers’ Association (MTDA) leh Mizoram Truck Owners’ Association (MTOA) hruaitute nen Mizoram châk lak luhna, Kawnpui leh Khamrâng inkâr kawng chhe lai leh siam lai te an an enho.

PWD minister chuan, “Kawng chhia avanga Mizoramin harsatna kan tawh mek hi sawrkar chuan pawi a ti a, kan ngaihven reng a, hmalakna pawh a kal mek a ni,” a ti a. “Thu-a sawi mai ai hian a siam that hna hian hun leh tha, sum leh pai a mamawh hnem a, duh angin thil a tih zung zung theih loh a ni,” a ti bawk.

Sawrkarin theihtawpin hma a la zel dawn a, mipuite pawhin hmalakna dawhthei taka lo ngaichang turin a ngen tih a sawi bawk.

Mizoram mamawh chawk luhna ber, National Highway 306 hi a bikin Khamrang leh Kawnpui inkar hi sawrkar hmasa hun lai atang tawhin vawi tam thuam that lo ni thin fur a dawl zo meuh thin lo niin a sawi a, “Kuminah pawh PWD chuan fur lo thleng tur atan inhmakhuain thal laiin theihtawpa thawm tha mah se fur a nat em avangin harsatna a thlen leh ta a ni,” a ti. 

PWD minister leh Kolasib bialtu MLA Lalfamkima chuan mipui harsatna hriain Thawhlehni khan MTDA leh MTOA hruaitute hi an kawm a, an inkawmna bawhzui hian kawng chhe lai hi an enho a, chak zawka thuam that dan tur leh mipuite leh lirtheia eizawngte harsatna sutkian dan turte sawiho.

Kawng enhonaah hian bialtu MLA, H.Ramliana, Chief Engineer (Highway) leh mi pawimawh dangten minister hi an tawiawm.