ZALEN Feb 6, 2026: Fur tan hmain (April) Kawnpui leh Sairang inkar kawngchhia chu siam tha turin High Court-in thu pe

February ni 4, 2026 khan Gauhati High Court, Aizawl Bench-a Justice Marli Vankung leh Justice Mridul Kumar Kalita-te thutna bench chuan Kawnpui leh Sairang inkar kawngpui dinhmun chhe tak chungchanga Mizoram Truck Drivers Association (MTDA)-in PIL a thehluh chu a ngaihtuah a. 

M/S J Infratech Ukil Anil Kumar chuan hnathawktu mi 87 Project-1 ah, mi 96 Project 2 ah an chhawr mek thu court a hriattir a. Heng bakah hian Excavator panga, Back hoe loader panga, tipper 13, roller pasarih, water tanker pali ten hnathawhna hmun an vil reng thu a hrilh.

Court chuan M/S J Infratech Ltd. chu Bilkhawthlir-Kolasib (72-95km), Kawnpui-Khamrang (118-133 km) leh Buichali-Sairang (147.8-159 km) kawng siam thatnaah chuan theihtawp chhuah tur leh hnathawk leh hmanrua belh zel turin thu a pe a, hnathawh chu April 2026 tawp hma ngeia zo turin thu a chhuah bawk.

Court chuan M/S J Infratech Ltd chu January ni 22, 2026-a meeting minutes hmanga hrilh an nih anga hmanrua belh a nih dan leh hna kalpui hmasawnna chu additional affidavit hmangin thehlut turin thu a pe a. He thubuai hi March ni 11, 2026-ah ngaihtuah leh turin a ruat nghal thu Supreme Court Advocate on Record JC Lalnunsanga'n a website-ah a tar lang. 

(Thlalak : File picture)

#ZalenNews