Aizawl August 28, 2024 : Eptu party lamin kawngpui chhiat avanga sawrkar demna social media ah an thehdarh chu ZPM chuan an chhang let a, an sawrkar laia an mahni kawng siam ngei ni si, furkhat pawh a daih loh avanga sawrkar thar dem nana an han hmang leh mai si hi mahni mawnghlimna mai leh sawrkar lai beih chak vang hrim hrim niin a lang an ti.

ZPM chuan, "Sawrkar hmasate hunlai khan kawngpui a chhe thin hle a, mipuiin kan hre vek a ni, hmun thenkhatah phei chuan khawpui chhung kawng chhia leh tui tlingah buh te an inphun sak hial a nih kha, kumin fur khat pawh daih lo kawngpui pawh hi sorkar hmasa siam tho kha a la ni," an ti.

"ZPM Sawrkar hian kumkhat em pawh sawrkar nan hun a la hmang lova, kum tam tak lo sawrkar tawhte tih theih loh ti nghal vek tura eptu party lamin mipui hnena beiseina diklo an tuh thin hi a pawi hle a, ZPM in sawrkarna a chan tirh atangin hna thawhna hun tak tak hi a la awm meuh lo."

"Sawrkar kalphung anga 9th Legislative Assembly Session hun rei tak chhung neihte, MP Election Model Code Of Conduct in hun rei tak min phuar vangte khan ZPM Sawrkar hian hna thawh nan hun a la nei tlem em em a ni. Eptu party worker te hian tuna an aupui mek leh sawrkar leh a changtu minister dem nana an hman hi an hotute kawngpui siam ngei kha a ni a, fur khat pawh a daih lo a ni zawk," an ti bawk.

ZPM chuan PWD changtu minister Vanlalhlana hmalaknain kawng chhe siamna tur ruahmanna hi siam vek tawh a ni a, fur lai a nih avangin hmalak a harsa a heng kawngpui chhiate hi la siam that theih a ni lo. Fur a zo ang a, kawng chhe siam hna thawk tura ruahmanna peih sa vek tawh hi sawrkar chuan a taka hmalak thuai tum a ni an ti.