ZALEN January 28, 2026: Serchhip DC Paul L Khuma hoin vawiin khan Serchhip DC Meeting Hall-ah Baktawng leh Chhuanthar khuaa furniture workshop ten a chhehvela cheng mipuite hriselna atana harsatna an siam thu report thehluh chungchangah inrawnkhawmna neih a ni a. Serchhip SP Gavit Gogna leh mi pawimawh dangte an tel.

Sr. CMO Dr. LP Malsawma chuan air pollution avanga mihring hriselna chhiat theih dan sawiin, Health worker te pawhin Chhuanthar naupang ten hritlang awmna an vei rei bik tih an report thu a sawi a. Furniture workshop atanga boruak thalo in a thlen a ni thei em tih chu finfiahna awm rih lo mah se, thil awm thei a nih thu a sawi. Meeting-ah hian Baktawng leh Chhuanthara furniture workshop neitute koh tel niin an eizawnnain mipuite hriselna a nghawng thei tih chu an inpawm thu leh, theih ang anga inkaihhruaina pawh an siam thin thu an sawi a ni.

He harsatna tawh mek chinfelna tur hian meeting chuan uluk taka inrawnkhawmna an neih hnuah Industrial Vacuum Cleaner chu society anga hman ni se; Chhuanthar MPACS lam hian 3 an dawn tawh chu hmang tan nghal se, an ti a. Baktawng chu Industrial Area-a puan a nih vat theih nan thuneitute hma la tura ngen an ni a, industrial area -a puan chin huamchhungah mihring chen khap tlat ni se, tih a ni bawk.

He harsatna chinfel a nih theih nan leh mipui hriselna atana him tur inzirtirna kawngah chak taka hma la turin Baktawng leh Chhuanghar VC te leh Society hruaitute chu ngen an ni a. District Administration chuan tih tur leh tihloh turte kimchang taka ziakin Prohibitory Order a tichhuak dawn bawk a ni.

DC Paul L Khuma chuan Baktawng leh Chhuanthara furniture workshop neitute kut themthiamna chu fakin, hma sawn zel tur leh tunlai khawl thar ber ber te nena inzir chho zel turin a fuih a, District leh Mizoram ang pawha tihmingthatu an nih zia a sawi bawk.

Vawiin meeting ah hian District thuneitute bakah Chhuanthar leh Baktawng VC te, Joint VC aiawhte leh mi pawimawh dangte an tel a ni.