ZALEN October 20, 2024 : Food Civil Supply & Consumer Affairs (FCS&CA) Director Saizikpuii’n fur ruahtui tlak chhungin khaw hmunah mah buhfai harsatna a thleng lo tih ZALEN a hrilh a. Hetihlai hian Mizorama ration card nuai hnih chuang awm a hming chuang zat chu 11,69,048 a tling.

ZALEN zawhna chhangin FCS&CA director chuan Mizoramin furpui a tawrh hun chhunga buhfai harsatna a thlen lohna turin department-in theihtawp an chhuah tih a sawi a, Cyclone Remal-in buhfai an stock thenkhat tihchhiat nei mah se khawi hmunah mah harsatna thleng a awm lo niin a sawi.

FCS&CA department chuan furpui lo thlen laia hmun thenkhat lirthei kalpawh theih lohna khuaa mipuiten ei leh bar an tlakchham loh nan buhfai mamawh tur ang zatte a chhek khawl lawk a, kumin chhung hian centre 61-ah monsoon stocking neih niin, heng centre hrang hranga buhfai mamawh chhekkhawl zat chu qtls. 1,53,048.00 a tling.

FCS&CA department tar lan danin, tun dinhmunah an department hnuaiah supply centre 120 awmin, heng centre-a godown awm zawng zawng belhkhawm hi 143 a ni a, godown zawng zawngte capacity belhkhawm chu MT 45,780 a ni.

Tun dinhmuna Mizorama ration card awm zat chu 2,89,926 niin, chuta mihring inziak lut zat chu 11,69,048 an ni a. Aizawl district-ah card 98,388 awmin, mihring awmzat 4,20,834 an tling a, Champhai district-ah card 18,825 awmin, mihring awm zat 77,856 an ni.

Hnahthial district-ah card 5,220 awmin, mihring awm zat 20,566 an ni a, Khawzawl district-ah card 9,321 awmin, mihring awm zat 39,548 an ni a. Kolasib district-ah card 22,514 awmin mihring awm zat 89,560 an ni a, Lawngtlai district-ah card 25,951 awmin, mihring awm zat 97,913 an ni.

Lunglei district-ah card 41,870 awmin, mihring awm zat 1,53,516 an tling a. Mamit district-ah card 21,263 awmin, mihring awm zat 85,611 an ni a, Siatual district-ah card 10,293 awmin mihring awm zat 46,764 an ni a. Siaha distrit-ah card 16,348 awmin, mihring awm zat 61,905 an ni a, Serchhip district-ah card 17,939 awmin, mihring awm zat 74,975 an ni.