Kum 33 WBC heavyweight champion Tyson Fury chuan Boxing chawlhsan a tum thu alo puan tawh chu nem nghetin, boxing ring chhunga inhnek a tum tawh loh thu a sawi chiang. 
 
Pathianni liamta a Wembley a mipui pungkhawm 94,000 zet hmaa Dillian Whyte a knockout hnu khan a a chawlh tur thu hi a lo sawi tawh a, he a thu puan chhuah hi British fighter Tyson Fury hian Piers Morgan's TalkTV show-ah sawi lehin a chawlh tawh tur thu a sawi nawn.

A thutlukna hi a duhthlanna a nih thu leh a chhungkaw tan hun tam zawk hman a duh tawh vanga he thutlukna hi siam a nih thu a sawi. 

Fury chuan,"Boxing hi khelh zel ka chak rualin ka tan a tawk tawh rih a, chawlh a hun tawh a ni. Sum leh pai bakah hmingthanna leh ropuina title ropui tak tak ka khum tawh a, tunah hian rilru fim tak chungin ka chawl dawn a ni," a ti.