Aizawl February 28, 2023: Mizoram-in G20 hnuaia Business 20 (B20) a thlen turah Mizoram chu a phak tawkah chuan a inpeih tawh tih Chief Minister Zoramthanga chuan a sawi a, sumdawnna kawnga hma kan sawn theihna tur atana he intawhkhawmna hi Mizoram-in a hlawkpui ngei theihna turin ram hrang hrang atanga lo kal te chu hmin ngei tumin ruahmanna an siam thu a sawi.

Aizawl chuan March 1-3, 2023 hian khawvel pum huapa sumdawnna khawmpui lian B20 chu a thleng dawn a, tun hi North East-a he intawhkhawmna an neih tum hnihna tur a ni. India hian G20 presidency nihna chu December 1, 2022 atanga khan a chelh tan a, India hnuaia G20 presidency a tluk luh atanga a thupui chu "VasudhaivaKutumbakam" tih a ni a, hemi awmzia chu "Khawvel chhungkaw khatah" tihna a ni a, G20 presidency India in a chelh hi khawvel ram hrang hranga te hnena inphochhuahna hun tha tak tura ngaih a ni.

B20-ah hian policymaker, ram hruaitu, sumdawnna lama mi thiam te leh sumdawng hotulu te an fuankhawm dawn a, Mizoram-in eng theihna nge a neih tih te chu an rawn zirchiang ang a, sawihona te neiin hmalak dan tur te an duang ang. Mizoram-ah hian eng ang investment nge kalpui chi tih te chu lo chhawpchhuah tum a ni a, kan nunphung, kan hnam rohlu neih te, kan festival neih leh tourism lama kan theihna te chu palai lo kal te hi hrilh hriat an ni ang.

Aizawl hian ram 17 - Argentina, Bangladesh, Bhutan, Canada, Costa Rica, Cote D’Ivoire (Ivory Coast), China, France, Germany, Ghana, Japan, Nepal, Russia, Sri Lanka, South Africa, United States leh Zimbabwe aiawh te a lo mikhual dawn a, heng bakah hian India ram chhung leh tualchhung mi engemaw zat an tel bawk ang. Ram pawn atanga hian mi 48 an tel thei tura ngaih a ni a, sumdawnna lama mi thiam bik 17 chu Bhutan, Bangladesh leh Japan atangin he hunah hian an rawn tel dawn bawk a ni.

March 2, 2023 a neih tur Buisiness 20-ah hian Urban planning, Infrastructure, Bamboo, Startups, Skill Development, Handloom & Handicraft, Nursing leh Paramedics lama state theihna te sawiho a ni dawn a ni.

Conference hi Shri Som Parkash, Minister of State for Commerce & Industries, Government of India leh Dr R K Ranjan Singh, Minister of State, External Affairs, Government of India te bakah sawrkar laipui leh state official te an tel dawn bawk. 

He hunah hian Confederation of Indian Industry (CII) bultumin, Business to Business (B2B) leh Business to Government (B2G) meetings te neih a ni dawn a. Ram pawn atanga Business Delegates lo kal te leh tualchhung industry lam te inkawmna hun buatsaih a ni ang. B2B leh B2G atan hian sawiho tur 100 chuang chhawpchhuah a ni.

G20 meeting-a rawn kal te hian naktuk hian Aizawl an rawn lut ang a, zan lamah Governor chuan zanriah a buatsaih ang a, March 2 hian MZU-ah Conference hi hman a ni dawn a, March 3-a Lammual-a Chamchar Kut hmanna turah an tel dawn bawk a ni.

He hun Aizawl-in a thlen theihna atan hian Chief Minister Zoramthanga chuan Prime Minister Narendra Modi, Home Minister Amit Shah leh External Affirs Minister Subrahmanyam Jaishankarji te leh minister dang te bakah he conference a thlen theihna atana thawktu zawng zawng te chungah lawmthu a sawi a ni.