Ukraine president Volodymyr Zelensky chu ram ropui pasarih intawh khawna G7 Summit-ah thusawi tura sawm a nih angin video kaltlangin thu a sawi. Zelensky hian Russia doletna kawngah chak zawka hma lak a tul thu sawiin, ralthuam tam zawk pe turin a ngen bawk. 

Kum 44 mi Zelensky hian G7 ram hruaitute chu Russia hmalakna dolet kawngah chak zawka hma lakpui atan a sawm a, military support an mamawh thu a sawi. Ukraine tan ralthuam tam zawk pek a phut
 a, thlasik zawh hmaa indo tihtawp a tul thu a sawi uar hle bawk. 

G7 hruaitute hian sipai ?anpuina tam zawk pek an tum a, Russia laka hrekna dang pawh siam belh an tum. Zelensky hian Russia rangkachak lakluhna tihtawp sak turin a ngen bakah, Russia oil leh gas te chu na zawka hrek a duh thu a sawi. 

Africa leh Middle East-ahte ?âm a thlen hlauhthawnna a san chhoh zel avangin UK PM Boris Johnson chuan Ukraine lawng chawlhna hmuna buhfai supply lakchhuah a nih theih nan hma lak a pawimawh thu a sawi ve bawk. 

Pathianni atang khan Russia chuan missile hmangin Ukraine khawpui Kyiv a kap leh tawh a, hei hian khawvel ram hruaitute lu a tihai hle. G7 (Group of Seven) ah hian khawvela ram hausa ber ber - Canada, France, Germany, Italy, Japan, UK leh United States te an awm a, Germany-ah Summit an nei a ni.