Insual thiam leh mi huaisen te tuallenna UFC-ah tukin khan Leon Edwards chuan welterweight champion lai Kamaru Usman chu knock out hmanga hnehin champion kawnghren a hreng. 

Salt Lake City-a Vivint Arena-a insual, chakna changta Leon Edwards hi a pa chu misual hotu niin amah pawh hian gang a zawm ve hman tep a, mahse kum 17 mi a nihin Mixed Martial Arts (MMA) lamah kalin a tiatpuiah khawvel a ngam ta der mai. Edwards-a chanchin danglam hi tukin Zalen sport huangah ziah a ni nghe nghe. 

Main events insual-ah hian chak zawk tura rinkai Usman hi round khatna atangin a chetha nghal zawk a, Edwards pawh a chechhe hran lo. Usman hian a keuh tlu hmasa a, a hnuah bawh betin a dul chungah thutin hnek rem thei ang berin a insiam rem, han hnek fe mahse Edwards a lo inveng thei zel a, a tawpah a submit teuh viau a, mahse Edwards-a'n tlawm mai a tum bik tlat lo. Dinhmun rawn siam thain a chetha zawkah a rawn tang leh thei. 

Tleirawl lai atanga insual hrat khawkheng Edwards hian huaisen takin bei let mahse, pa huaisen leh rothap Usman a inveng thiam a, a experience a hmang tangkai thiam bawk nen Edwards-a'n a ngam tha lo. Round 1-na bak chu Usman hi a chungnung zawk vek hial ang tih turin a chetha leh thung. 

Fighter tha tak a nih vanga hun rei tak a weight category-a rorel tawh Usman hi chak ngei tura ngaih a nih tawh hnuah Edwards-a hian round nga-naah zetin Usman hi a ke veilamin a head kick a, Usman-a meuh tan pawh tawrh zawh rual a ni lo. Octagon laiah a thal nghal tawp a, che zui tur a awm tawh lo. Edwards-a chuan a vawi khat nan champion belt a hreng ve ta.

Usman hian a champion belt hi a hum rei hle a, tum 18 zet chu UFC fighter tha tak tak Colby Covington, Jorge Masvidal leh Gilbert Burns adt laka a lo hum tawh chu Edwards-a lakah a hum zo ta lo. Edwards pawh hi kum 2015 December thla atang khan tlawm a la nei bik lo a, a zawnin vawi 11 zet a lo chak zawn ve tawh a, a kalkawngah hian fighter tha tak tak Nate Diaz, Rafael dos Anjos leh Donald Cerrone te pawh a tlawm ve tawh a ni. 

Co-main event lamah middleweight title challenger hlui Paulo Costa chuan UFC middleweight champion tawh veteran Luke Rockhold chu unanimous decision-in a hneh. La insual thei viau mahse kum 37 lai ni ve tawh Rockhold chuan MMA a chawlhsan tur thu a sawi zui. 

Main-card results:
Welterweight   
Leon Edwards def. Kamaru Usman

Middleweight   
Paulo Costa def. Luke Rockhold

Bantamweight 
Merab Dvalishvili def. José Aldo          

Women's Bantamweight             
Lucie Pudilová def. Wu Yanan     

Light Heavyweight         
Tyson Pedro def. Harry Hunsucker