Aizawl: Zirtawpni zan dar 8 khan Traffic Co-ordination hnuaia Working Group Committee Member-te leh Transport Department, Traffic Police leh veng hrang hranga Local Council hotute chu Aizawla SP Office kawtah an inhmukhawm. Traffic Group Working Committee Convener Pu Lalbiakzama chuan sorkarin lirthei neitute Garage nei vek tura hun tiam chu a lo zawh tak avangin kawngsir motor chi hrang hrang dah hnawkte endikna neih a nih tur thu puangin Team 5-ah inthenin garage leh parking phalna hmun ni loa motor dahtute vai an nih tur thu a puang. Veng hrang hranga motor dah hnawk an awm leh awm loh endikna neih nghal niin endiknaah hian motor chi hrang hrang eng emaw zat sorkar thupek zawm lo hmuh an ni a. Heng motor-ah te hian sticker bel niin Traffic Police Control Room-ah in-report-a MV Act 179 an zawm loh avanga Rs. 500 an chawi tur keng tel tura hriattir an ni.  Garage nei lo leh parking hmun lova motor dahte vaina hi neih fo a nih tur thu Traffic Working Group Committee te chuan an sawi. December 1 atang khan khawpui chhung Motor garage nei lote endikna Working Group  Inspection Team te hian nei tanin motor man/ bel zat chu hetiang hi a ni. Chanmari West-ah 85, Chhinga Vengah 29, Saron Vengah 9, Bawngkawn South-ah 5, Zarkawtah 2 , a vaiin -130 an man a ni.