Aizawl: Legal Metrology Department in gas buk tlinglo bur 1145 an man te chu nimin zing khan Borkhola Gas Bottling Plant an thawnlet an ni. Legal Metrology thawktute sawi danin nimina gas bur thawnlet te hi February ni 6,2017 a man te an ni a, an vai hian Silchar lam atanga rawn phurh niin a tichingpentu driver pawh hi hnamdang vek an ni. Nimina gas phurh lette hi Zoram Indane Gas service ta tur bur 20, MIZOFED Gas Agency, Aizawl ta tur bur 511 leh Biakkungi Gas Agency ta tur bur 614, a vaiin bur 1145 a ni a. Legal Metrology thawktute chuan gas khawih chingpentu driver 6 te hi dan angin pawisa an chawitir bakah thun khat leh turin an ti a ni. Legal Metrology in distributor te hnena thuchhuah a siam dan chuan gas bur chu mipuiin an buk theih ngeina tura ruahmanna siam turin a ti a, hetih rual hian mipuite pawhin buk tir nachang hre tur leh harsatna an neih pawhin thuneitute hriattir nachang hre turin a mipui te chu a ngen bawk a.  Gas khawih chingpen an hriatte pawh zep lovin a rang thei ang berin report nachang hre turin a ngen bawk a ni.