Aizawl: Legal Metrology Department chuan thla 18 kalta (March 2015 atanga August 2016) thleng khan Gas buk tlinglo bur 4669 an man tawh. Thla 18 kalta chhung khan Legal Metrology Department hian gas phur truck 3718 a gas bur 1137708 endikin bur 4669 chu buk tlinglo anih avangin an man a, a phurtu driver te chu gas an tihchingpen avangin a buk tlinlohna ang angin chawitir thin an ni a, an chawitir tlingkhawm hi Rs. 219,500 a tling a ni. Legal Metrology Department thawktute chuan gas te hi hmun hrang hrangah tih chingpen fo anih thu sawiin theihtawp chhuah mahse thawktute indaih loh avangin an veng senglo tih Zalen an hrilh a. Gas buk tlin leh tlinloh chu IOC lam mawhphurhna a ni zawk nia sawiin kawng laka tih chingpen ven kawngah erawh sawrkarin theihtawp a chhuah niin an sawi a. Gas tih chingpenna hmanrua hi Silchar vela Rs. 150-250 vela a lei mai theih avangin ven a har hle a, a ti chingpen an man te chu an motor te an dintir bakah a tlinlohna ang ang pawisa an chawitir thu an sawi. Tunhnaiah Gas tih chingpen a tlem deuh nia sawiin Legal Metrology thawktute chuan, “Distributor te hnenah an gas thleng te buk ngei ngei tura hriattir an nih avangin a chingpen hi a tlem phah niin kan hria a ni,” an ti bawk.