Aizawl: Legal metrology department chuan kumin January atanga April thla thleng khan gas bûk tling lo bûr 1019 an man tawh. Legal Metrology-te hian hemi hun chhung vek hian gas buk tling lo an mante pawisa an chawitir (compounding fine) atangin Rs.61,000 an hmu a, a bûk tlin lohna zat hû an rulh let tir zat chu Rs.83,860 a ni. Legal Metrology-te hian gas bûk tling lo an mante chu a bûk tlin lohna ang zelin mipuiah a man tlawma hralh turin agency-te an hriattir thin a, a bûk tlin lohna zat hû chu a phurtu driver chawitir thin a ni. Legal Metrology hotute chuan, “Dan ang tak chuan hralh chhuah loh tur a ni a, mahse mipuite’n an mamawh tho si avangin a man tlawmin kan hralhtir mai thin a ni,” an ti. Legal metrology department thawktute chuan Direct Benefit Transfer in LPG (DBT) kalpui a nih hnu in Gas tih chingpen a hluar nia an ngaih thu sawiin, he system kalpui a nih hnu hian dan anga thlapa Gas lei a nih tawh avangin duh duh angin a lei theih tawh loh avangin gas buk tling lo hi a hluar zual deuh a ni an ti a, tun hma lama Gas tihchingpen a nih thin chhan chu Gas van vang a ni,” an ti. Gas bûk tling lo an mante pawh a man tlawma hralh tura an tih niin a latute chu receipt la tel turin an chah bawk.