Aizawl: Legal Metrology Enforcement te chuan kar kalta Thawhtanni (6.2.2017) a gas khawih chingpentu driver 6 te chu dan angin an hrem. Ningani leh Zirtawpni khan Legal Metrology hian an office ah IOC Sales Maneger Martin Gangte  bakah gas dealer pathum Zoram Indane gas, Biakkungi gas agency leh Mizofed gas agency te chu kawmin thil awmdan an sawipui a. IOC thuchhuak angin gas te hi an rawn phurhna Silchar ah thawnlet a ni dawn a, refill hnuah agency hnenah pek chhuah leh nghal tur a ni. Gas buk tlinlohna hi driver te hian an chawi dawn a, tunah hian Hunthar-Edenthar kawngah an la ding a, tihfel ngaite tihfel anih zawhah Silchar an pan ang. Legal Metrology chuan mipuite chu an gas lak dawnin buk tir nachang hre turin an ngen a, gas buk tling lo emaw a leak emaw chungchangah harsatna an neih chuan gas agency te hnenah hriattir tur leh a tul angin sawrkara dan lekkawhtu te hnena hriattir nachang hre tur leh mahni remhriatna anga che mai lo turin an ngen a ni.