ZALEN April 30, 2026 : Lunglei district jail-a tâng mi 15 te chu Court lehkha lem (siam chawp) ni ngeia hriat hmangin Lunglei District Jail aṭanga chhuahtir an ni a. He thil thleng chungchangah hian District and Sessions Judge, Lunglei chuan Lunglei Police Station-ah FIR a thehlut a, April ni 29, 2026 ah khan ziah luh niin Police te chuan mawhphurtu nia hriat Jeremy Lalthangtura, District Jail, Lungleia tang mek lakah thubuai an ziak lut. 

Zonet Lunglei chanchintharin a tarlan danin jail atanga chhuak mi 15 atang hian mi 12 te chu an man let leh tawh a, mi pakhat chu thi tawhin, pahnih dang te chu state dang mi an nih thu an tarlang.

Jeremy Lalthangtura hi Ukil lem chang thubuaia jail-a tang mek a nih thu Lunglei Police te chuan an sawi a. A jail tanpui te chu pawisa chawitirin ruahmanna a siampui tih an tarlang bawk.

April ni 15, 2026 ah khan tâng pahnih chhuahna turin lehkha an dawng leh a, hei hi Court lama thehluh tur niin, District Court lam chuan he lehkha hi an tihchhuah a nih loh thu an sawi tak avangin rinhlelhna a awm ṭan a. A hmaa an lo chhuahtir tawhte pawh lehkha lem a ni thei tih rinhlelhna a awm zui a, Lunglei Police Station-ah FIR thehluh a ni ta hial a ni.