ZALEN May 27, 2026: Gauhati High Court, Aizawl Bench chuan vawiin khan Mizoram University (MZU) Registrar nilai Professor Lalnundanga chu a post chelh Registrar a nihna chu a hlih sak.

ZALEN-in thu a dawn danin Professor Lalnundanga hian Registrar hna hi term khat (kum 5) a chelh hnuah November 19, 2024 atanga khan a term hnihna hi a chelh leh a, mahse, he dinhmun a chelh leh danah hian thil fel tawk lo awm nia an ngaih avangin Registrar ni tura a candidate pui pahnih te chuan an khing ta a ni.

Prof. Lalnundanga khingtute hian December 13, 2024 khan an zualkona lehkha hi Gauhati Hight Court-ah hian an thehlut a, an thubuai hi engemaw chen ngaihtuah a nih hnuah vawiin hian High Court Judge chuan thutlukna hi a siam a, Prof. Lalnundanga, MZU Registrar a nihna chu a hlih sak a ni.

MZU atanga Registrar nihna an hlih sak tak Prof. Lalnundanga term hi April 30, 2024 khan a tawp a, MZU Vice Chancellor chuan May 1, 2024 atanga khan a hna hi a thawk chhunzawm turin thuneihna pe a, a term hnihna chelh leh tura interview a hmachhawn thlengin a nihna hi a chelh niin sawi a ni.

Thu dawnna in a sawi danin Registrar thar la tura board-a thu tura rawtna leh sawmna pawh hi Prof. Lalnundanga siam, e-mail thawntu pawh amah bawk nia an hriat thu ZALEN an hrilh a, board a thu te pawh hi a hre lawk sa vekah an ngaih thu an sawi.

MZU Registrar term kal mek atan hian mi 10 te chuan dilna an thehlut a, heng zinga 6 te chuan interview hi an hmachhawn a, October 23, 2024 khan interview hi neih a ni. November 19, 2024 khan Prof. Lalnundanga hian a term hnihna hi a chelh tan a, tuna amah khingtu te hian December 13, 2024 khan an lungawi lohna hi court-ah hian an thlen a ni.