ZALEN June 6, 2026 : Gauhati High Court chuan, PAHOSS Scheme (Parking House Support Scheme) hnuaia Parking sak nana sum pekchhuah te chu dik taka hman an ni em? tih chungchang Suo moto case file chu July 15, 2026 khian a ngaihtuah dawn.

January 26, 2026 khan, Gauhati High Court chuan Mizoram sorkar chu Parking House Support Scheme (PAHOSS) hnuaia tanpuina sum pek chhuah zat te, tanpuina dawngtu zawng zawngte hming, tanpuina sum hmanga in sak an hman zui dan leh thil pawimawh dang te (affidavit, etc.) Gauhati High Court-a thehlut turin a lo hriattir tawh a ni.

Suo moto a case file-naah hian, PAHOSS scheme hnuaia House Parking sak nana sum pekchhuah chungchangah hian, a hnuaia tarlan te hi a chhui mek leh a ngaihtuah tur pawimawh zualte an ni:-

1. Parking area sak nana pawisa dawng zawng zawng te hian, PAHOSS Scheme in a duan angin an parking area sak te chu an hmang chhunzawm zel em? tih finfiah chungchang,

2. Sorkar leh beneficiaries (pakhat aiin an tam ang tih thu hlaah ka rawn plural) te inkara inremna thuthlung an siam te enfiahna (report hi theh lut fel tawh tura ngaih an ni),

3. PAHOSS Scheme duan anga hmang lo te chu an pawisa lakletsak dan tur guideline siam turin Gauhati High Court hian direction a lo pe tawh bawk. Heng te hi a ngaihtuah dawn a ni.

PAHOSS Scheme kha, Aizawl khawpuai Traffic jam ti-ziaawm tura hmalakna leh Sorkar hmasa MNF Sawrkar Flagship programme a ni a. Feb. 6, 2019 khan, Hetihlaia Chief Minister Zoramthanga chuan Chief Minister’s Conference Hall-ah a tlangzarh a. MNF Sawrkar khan an Flagship programme hmang hian, “Aizawl khawpui chhunga traffic jam-a harsatna lian tak kan neih thin hi, he PAHOSS Scheme hmang hian sutkian theih an beisei” a ni, tih a ni.

PAHOSS Scheme atan hian thawhkhatna chu, June 13, 2019 khan, Vanapa Hall-ah khatihlaia CM Zoramthanga chuan PAHOSS hmanga Parking House sa tura thlan, mi 99-te hnenah tanpuina hi pe-in, Rs. 1746 lakhs a semchhuak a ni. PAHOSS atan hian Mizoram Sawrkar khan, kum 2018-19 atan budget-ah Rs.1,000 lakhs a dah a, kum 2019-20 budget atan Rs.6,000 lakhs a dah leh bawk a ni. Record-a a landanin, PAHOSS atan hian, Rs.1,136.4 lakhs pekchhuah a ni tawh a ni. PAHOSS Scheme duan ang hi chuan (Sum pekchhuah tawh atanga chhutin), Aizawl khawchhunga HOUSE PARKING ah hian, Lirthei- LMV-4,764 leh Two Wheeler-8,994, a vaiin Lirthei 13,758 dahna awm anga chhut a ni bawk.

He thubuai hi Aizawl traffic kaihhnawih a ni a, Gauhati High Court-ah PIL suo moto case lutin, Court-in a ngaihtuah a. January 20, 2026 khan High Court judge Justice Michael Zothankhuma leh Justice Pranjal Das te thutna Division Bench chuan thupek (order) a tichhuak a, chawlhkar thum chhunga Affidavit thehlut turin UDPA department a hriattir a ni.

Thubuai hi High Court-in a ruat Amicus Curiae (ukil) chuan a bawhzui a; Aizawl khawpuia lirthei hûnna (parking) chungchanga harsatna tihziaawmna tura UDPA department-in scheme a siam PAHOSS hmangin mi thahnem tak hnenah tanpuina pek a nih thu te, UDPA-in cheng vbc 11 vel a pek chhuah thute Court a hrilh a ni.