Aizawl September 9, 2024 : Gauhati High Court chuan Mizoram sawrkar chu hun a hawnsak leh a, thla hnih chhungin State Human Right Commission (SHRC) din turin thupek a chhuah a, a nih loh chuan Court zahlohnaah a ngai dawn niin thulakna chuan a tarlang bawk.

Thla 2 chhungin Human Rights Act of 1993 in a phut angin leh Hon'ble Supreme Court in Dilip Kumar Basu chungchanga thu a tih tluk chawi nungin 'dikna a lal theihna atan,' thla 2 chhungin Mizoram sawrkar chuan State Human Rights Commission a din tur a ni tiin Gauhati High Court chuan hriattirna a chhuah a ni. Thla 2 chhunga hriattirna hi zawm a nih loh chuan court zahlohna lantirnaah High Court chuan a ngai dawn tih thu Live Law chuan a tarlang.

Chief Justice Vijay Bishnoi leh Justice Michael Zothankhuma te thutna bench chuan vawiin khan Aizawl-ah Zofa Welfare Organization (ZWO) Mizoram v. The State of Mizoram & 5 Ors. te Case No.: PIL/4/2021 chungchang hi a ngaihtuah a ni.

Court hearing-ah hian Protection of Human Rights Act, 1993 (the Act of 1993) in a phut anga Mizoram State sawrkarin State Human Rights Commission a neih loh avanga PIL lut hi ngaihtuah a ni.

Court chuan writ petition (PIL) hi 2021 atanga khan pending tawh a ni tih an hmuchhuak a, he thu ngaihtuah a nih apiang hian State sawrkar chuan SHRC chu din tumin hmalak mek a nih thu an sawi thin tih a ni.

September 03, 2024 khan additional affidavit chu Secretary to the Home Department, Government of Mizoram-ah thehluh leh a ni a, hetah hian State Sawrkar chuan SHRC din turin hma a la mek tih tarlan a ni a, hemi bawhzui nan hian Mizoram sawrkar hnenah thawktu tur post 29 dilna pawh thehluh a nih thu tarlan a ni. Heng post an proposed atang hian August 08, 2024-a order chhuak angin post 16 hi pawm tura tih nghal a ni.

Hetihlai hian Court chuan post siam phalsak hi ziak chauhin a awm an ti a, a taka hmuh tur awm lo a ni, tiin thulaknaah tarlan a ni.