Mizo tlangval, Lallianzuala Chhangte-in India chu SAFF Championship 2023-ah final a luhpui a, minute 120 chhung zet Lebanon lakah inlanin a khel chhe lo lehpek a. Inkhelh tawpah coach Mahesh Gawli pawhin Mumbai City forward leh a thiante a fak nasa hle.

Inrinni zana Bengaluru khawpuia Sree Kanteerava Stadium-ah Blue Tigers hian semifinal-ah Lebanon chu penalty petah 4-2 in an hneh a, minute 120 an khelh chhungin hun tam zawkah India chungnung mah se goal an thun thei bik lo va, 0-0 in an inhnehtawk.

Semifinal-ah hian a tir atanga khel, Indian Super League Golden Boot kawl mektu, Lza hian a tlan theihzia leh ball khawih a thiamzia a lantir zauh zauh va, hun tha pawh a hmu a, goal-ah a chantir lo thung a; mahse, hun tawp dawn thlengin India-in goal an nawrnaah tangkai ber pakhat a tling.

Inkhelh zawhah Igor Stimac-a an hrem avanga a aiawha Lza te thianho kaihruaitu, Gawli chuan a naute chu minute 120 chhungin a tawp thlengin an chet dan a danglam lo nia sawiin a fak hle a, “A tir minute 15 kha chu kan khel a nawi deuh va; mahse, a hnu zawng kha chu kan thunun a. Minute 120 chhungin a ngai parhin kan khel tluan thei a, ka naute an fakawm hle,” a ti.

“Team pumin kan khel tha a, hun tha tam tak kan insiam a, kha kha goal-ah chantir vek ila chuan 3-0 emaw, 4-0 emaw lai a ni ang,” tiin India-in defender a neih tawha tha ber pawl, Gawli chuan a sawi bawk.

Tun hnaia Fifa ranking-a Top 100-a lut thar, India hian thla khat emaw lek chhungin Lebanon hi vawi thum an hmachhawn ta a, chawlhkar hnih liam ta maiah pawh khan Odisha-ah Mizo tlangval ho tho hian Hero Intercontinental Cup final-ah an lo hneh tawh a, hemi tum hian Lza hi Hero of the Match-ah thlan a ni nghe nghe.

SAFF Championship final hi Thawhlehni zan hian khelh a ni dawn a, semifinal lehlamah Inrinni tlai khan Kuwait-in si khat faiin Bangladesh hnehin final an lo lut tawh a, Blue Tigers nen final-ah an insu dawn a ni.