Gaza atanga rocket-a nasa taka an kah laia Israel-a lut helhovin an beih thutah Israeli 22 vel thah an ni.

Mi eng emaw zat Gaza-ah an hruai bawk nia sawi a ni a, a zat erawh hriat a ni rih lo.

Israel pawhin a chhan let nan thlawhna atangin Gaza-a hmun eng emaw zat a kap nghal bawk.

Israeli Prime Minister Benjamin Netanyahu chuan Israel chu ‘a indo mek’ tia sawiin Gaza-a roreltu, Hamas-te chuan an thil tih man chu ‘an la hriat ngai loh zat thlengin an pe dawn’ tiin a vau bawk.

Helho hian Gaza atang hian nasa takin rocket-in an kap a, hetih lai vel hian helho hi ramri hungna kanin Israel-ah hian an lut ta a ni.

Israeli sipaite hian fighter jet hmangin Gaza-a Hamas hmunte an kap ve nghal tih an sawi a, heng hmunahte hian an sipai thachhangdawltu tur sang tam tak an la awm niin an sawi.

Israel-in a kahnaah hian Palestinian pakhat a thi niin tual chhung damdawi in thuneitu chuan a sawi.

Gaza atang hian Juda-te Sabbath intan dawn, Inrinnia ni a chhuah vel chiah atang hian rocket kah tan a ni a. Inrinni kha Simchat Torah kût a ni bawk.

Israel ram chhung hmun hrang hrangah siren tihrik nghal niin IDF chuan Israeli ram chhung ‘hmun hrang hrangah mi firfiak an lut’ tih an puang zui nghal.

Chhim lam leh ram lailia cheng civilian-te chu tawmhimna (shelter) hnaiha awm tura tiin Gaza chhehvela mite phei chu shelter chhunga lut tura tih an ni.

Online-a video darhah chuan thuam famkim nena inthuam Palestinian hel, a duma inthuamte chu Sderot chhehvelah pick-up truck-a an tlan kual lai a lang.

Video dang pakhatah chuan heng helho ang bawka inthuamte hi thingtlang khaw pakhatah Israeli sipaite nen an inkap niin a lang a, an inkahna hi Gaza atanga km 1.6 vel chauhva hla a ni bawk.

Palestinian chanchinbute chuan helho hian Israeli eng emaw zat an hreng niin an tar lang hlawm a, Gaza-ah hian Palestinian thenkhatin Israeli sipai motor an khalh kual niin an sawi bawk.

Hamas-ten an beihna avang hian Israeli 545 velin hliam an tuar niin Israel health ministry chuan a sawi.

Israel chhim lama regional council pakhata an hotu, Ofir Liebstein chu an veng hum tuma a beihnaa helho nen an inkahnaah a thi bawk niin an sawi.

Inrinni tuk pum khan rocket hi kah a ni a, Israeli chanchinbute chuan Israel lam hawi hian thlawk thei 2,500 chuang kah a ni tih an sawi.

Chhim lama Ashkelon leh ram lailia Beer Sheva khawpuia damdawi inte chuan hliam tuar tam tak an enkawl.

“Israel khua leh tuite chu an indo mek a, beihpui thlakna a ni lo va, boruak sang pawh a ni lo va, indona a ni,” Prime Minister Netanyahu chuan a sawi a. “Tukin khan Hamas-ten Israel leh a khua leh tuite a bei thut a ni,” tiin a sawi.

“Venhimna lama hotute ka ko khawm nghal a, a hmasa berah chuan kan ram chhunga mi firfiak lo lutte thian fai turin ka ti a, he beihpui thlakna hi tan nghal a ni ang,” a ti.

“Hetih rual vek hian phuba lak nan kan hmelmaten an la hriat ngai reng reng lohva nain chhan let a ni ang,” a ti bawk.

Hamas sipai commander lawk chuan Hamas chanchinbuah beihpui an thlak tan hi tihchhuah a nih thu a sawi a, Palestinian zawng zawngte chu hmun tina bei turin a fuih bawk.

“He ni hi khawvel luahtute titawp tura beihna lian ber a ni,” tiin Mohammed Deif chuan a sawi.