Chief of Defence Staff General Bipin Rawat-a leh a nupui chuanna helicopter tlaa thi ve dang sipai parukte ruang chu Inrinni hian an chenna in theuh thlenpui an ni.

Tamil Nadu-a sipai thlawhna tlaah hian mi 13 an thi a, heng zingah hian mi pathum - General Rawat, a nupui Madhulika Rawat leh Brigadier Lakhwinder Singh Lidder te chauh puan chian an ni.

Thi dangte ruang hi Delhi-a Army Base Hospital-ah dah niin an chhungte an ni ngei em tih finfiah tura koh an ni.

Sipai parukte ruang chu tute nge an nih hriat a ni tawh a. Hengte hi - Lance Naik Vivek Kumar, Junior Warrant Officer Pradeep, Wing Commander PS Chauhan, Junior Warrant Officer Rana Pratap Das, Lance Naik B Sai Teja leh Squadron Leader Kuldeep Singh te an ni.

An ruangte hi thlawhna hmangin an khaw hnai ber tumhmunah thlenpui an ni a. Hawpui an nih hma hian damdawi inah thlahna hun hman a ni.

General Rawat, a nupui Madhulika Rawat leh Brigadier Lidder-a te erawh Zirtawpni khan Delhi-ah vui liam a lo ni tawh thung.

Chopper tlaa sipai thi dang - Lieutenant Colonel Harjinder Singh, Naik Gursewak Singh, Naik Jitendra Kumar leh Havildar Satpal te ruang erawh hriat a la ni lo thung.

Thi te dinhmun

Junior Warrant Officer Pradeep-a ruang hi chawhma dar 11:00-ah Tamil Nadu-a Sulur air base thlenpui niin km 124-a hla, Thrissur panpui zui a ni.

Wing Commander Chauhan-a ruang hian an chenna, Agra chu zing dar 9.45 khan a thleng thung.

Junior Warrant Officer Das-a ruang phurtu thlawhna chuan chawhnu dar 1:00 khan Bhubaneswar a thleng a, Odisha-a Angul district-a an khaw lam panpui zui nghal a ni.

Lance Naik B Sai Teja-a ruang pawh chawhnu dar 1:00 khan Bengaluru tumhmun panpui niin Andhra Pradesh-a Chittoor district-a an khua panpui leh a ni a. Lance Naik Kumar-a ruang pawh Himachal Pradesh-a Gaggal tumhmun thlenpui a nih hnuah Kangra district-a an in panpui leh a ni.

Squadron Leader Kuldeep Singh-a ruang pawh chawhma dar 11:45 khan Rajasthan-a Pilani tumhmun thlenpui niin Jhunjhunu district-a an chenna in panpui zui a ni.