Aizawl July 23, 2024 : MNF Legal Board chuan, ZPM sawrkar hian eirukna (corruption) do a tum tak tak lo. Mipui tanghma ngaia corruption do a tum tak tak anih ngai chuan General Consent hi Chief Minister Lalduhoma’n a lo tlangaupui tawh ang ngeia CBI te hnena pe leh nghal turin ZPM sawrkar an phut a, CBI chhui tur leh chhui loh tur case thlan kual vel nana hun khawhral lo turin an ngen.

MNF Legal Board Vice Chairman Lalpianfela Chawngthu chuan ZPM Legal Dept. ten Lokayukta-a case thlan chhuak bik pathum (3) te chauh CBI chhuitir tura ngenna lehkha an thehlut nghal hian entir dang a nei lo a, ZPM sawrkar leh Chief Minister hian an huat zawngte chauh CBI chhuitir a, an lamtang leh an mi leh sate erawh hum zel an tum zia a lantir a ni, a ti. Thil dik lo dang ZPM sawrkar hnuaia thleng mekte pawh a awm chuan ZPM sorkar hian CBI te chhuitir tur hian an ngen tel nghal turah an ngai, tih a sawi.

MNF Legal Board chuan CBI General Consent pek chungchang hi Press Conference leh Social Media lamah te vawi duai lo tarlan a ni tawh chungin thual nawn ve leh tul ni a an hriat avangin Press Conference nei ve ta tih an sawi. Chief Minister hian vawi duailo General Consent hi an pek tur thu a sawi a, Chief Minister thusawi bawhzui hian Vigilance Dept. chuan hetiang hian Notification chu December 28, 2023 khan chhuah a ni an ti.

MNF Legal Board chuan, "ZPM Sawrkarin CBI General Consent a pek dan chungchang ZPM Legal Department ten Press Conference-a sawimam an tumna kha rawn beihlet kan tum lova, MPCC hotuten an rawn sawifiah tawh avangin han sawi fiah ve leh kher pawh tulin kan hre tawh lova. Amaherawhchu, hemi chungchangah hian tuna an thil kalpui dan en chuan mipui bumna leh lemchanna ni ngeia kan ngaih avangin, Chief Minister-in a lo intiam tawh ang ngei ‘General Consent’ - a hmaa an lo pek tawh kha Sorkarin tinung leh ngei turin kan phut a ni," an ti.