Aizawl: Health Minister Lal Thanzara chuan nimin khan Aizawl Dinthar Veng, Health Directorate Office bulah man tlawm zawka damdawi lei theihna dawr Jan Aushadhi Store (Generic Drug Store) a hawng. Lal Thanzara chuan mipui mimir ban phak tura man man zawka damdawi zawrhna Dinthar Vengah hawn a ni leh ta chu lawmawm a tih thu a sawi a, “Mizoram chhung District Hospital tinah Generic Drug Store hawn a nih theih nan hmalak mek a ni,” a ti. Health Minister chuan mipui hrisel nan sawrkarin theihtawp a chhuah tih sawiin, India ram State lian leh hausa zawkah pawh doctor pakhatin mihring chutizat enkawl tur tih norms an zawm thei lo a, Mizoram State rethei zawkah a harsa lehzual tih sawiin mipui mamawh zualpui phuhru turin doctor 26 lak belh an nih thu a sawi bawk a ni. Hriselna kawngah Mizo mipui thanharh a tul tiin taksa insawizawi uar a, ei leh in, zuk leh hmuama insum turin Mizo mipuite Minister chuan a chah bawk a ni. Jan Aushadhi Store (JAS) ah hian damdawi dawr pang ngai aiin damdawi a let thum let li vela man tlawm zawkin a lei theih a. Damdawi hi a man to dan a zirin category 3 (A,B,C) ah then a ni a. A man to chi chu – A, a laihawl – B, a man tlawm chi – C tia bithliah a ni. Jan Aushadhi dawrah hian Group B thleng phak damdawi a awm mang lo. Damdawi dang man tona chhan ber chu a tuamna (packaging) leh a cheimawina te a ni a, a man tlawm avanga quality chhe chuang lo Generic/Jan Aushadhi damdawite hi a man a tlawm theih nan a tuamna man tlawm zawk, him tawk si, a chei mawina tello hman a ni. Jan Aushadhi/ Generic damdawite hi National Accreditation Board for Testing and Calibration Laboratories (NABL) pawmpui laboratory ah a that leh that loh uluk taka enfiah vek a ni.