Aizawl: Mi harsa leh rethei zawk ten man tlawm zawka damdawi an lei theihna tur Generic Drugs Store 'Jan Aushadi' tia hriat bawk chu hun reilote ah hawn tum a ni. Aizawl Civil Hospital Medical Superintendent Dr. Rosangluai-a chuan Generic Drugs Store hi tuna mitthi dahna in bulah sak an tum tih a sawi a. A sakna leh damdawi zawrh turte chu RKS sum hmanga tih a ngai nia sawiin RKS chairman, Aizawl DC in phalna a pek veleh hna tan nghal a ni dawn tih sawiin hmalak tan thuai an beisei tih a sawi bawk. Dr. Rosangluaia chuan December 2014 thleng kha chuan Generic Drugs Store a zawrh theih tur damdawi hi item chi hrang hrang 259 a awm tih sawiin item thenkhat chu mamawhna a awmloh avangin chah a ni dawn lo tih a sawi a, a chah tur list leh a zat pawh an tifel tawh niin Zalen a hrilh. Generic Drugs Store hi damdawi marketing (company) titute kaltlang lo a, a tira a siamtu te hnen atanga direct a leia zawrh chhawn leh tur a ni a, damdawi zuar chhawng leh tute a kaltlang dawn loh avangin man tlawm takin damdawite hi a lei theih dawn a ni. Damdawi hi Company ten an siam zawhah packing titu company dang ten la in an hnen atang hian stockist/wholesale ten an la leh chhawng a, chumi hnu ah damdawi zuartu ten an la chhawng ve leh a. Heng te hian hlep neia thil an tih vek avangin damdawi man a to phah thin a. Tuna Generic Drugs Store neih turah hian damdawi siamtu Company te kha direct in dawr an ni ang a, a tuam mawi leh pawlhdal awm lovin a nihna ang angin zawrh a ni dawn a, damdawi pawhin hna a thawk chak zawk dawn a ni. Doctor-te pawhin company hming ni lovin a damdawi hming tak ziakin an chawh a ngai dawn. Aizawl Civil Hospital, Medical Superintendent Dr. Rosangluaia chuan an damdawi zawrh tur chu Doctor te chawh turin an tilui dawn lo tih sawiin Doctor te chuan an duh leh thaa an hriat apiang an chawh thei dawn tih a sawi a. Generic Drugs Store chu a bultan nan Aizawl Civil Hospital ah hawn phawt a, a tul dan anga hmun dangah pawh hawn zel tum anih thu a sawi bawk. Dawr hi peih anih hunah chuan tuna damdawi Rs. 100 man vela mipui ten an lei thin hi Rs.20 vela lei theih beisei a ni.