Aizawl: Department of Geology & Mineral Resources (DG&MR) chuan quarry neitu dan anga thlatina department-a an sum chhun luh tur chhung lut loten an chawi tur Rs nuai 57.46 chu an chawi tir lo a, ONGC leh OIL pawhin annual fee an pek tur an tih khawtlai avanga an chawi tur Rs. nuai 60.43 pawh chawi tir an ni lo. Zalen lehkha kawlin a tarlan danin lung quarry neitute hian thla tina department-a chhunluh tur hi Mizoram Minor Minerals Concession Rules, 2000 hnuaiah an nei a, hemi chhung lut lo te hian nitin Rs. 20 an chawi tur a ni tih a ni bawk. Hetih lai hian quarry neitu 26 chuan April 2012 a\anga March 2015 chhungin danin a phut angin thla tina an chhunluh tur sum hi an chhung lut lo a. Department-a an chhunluh lo vanga an chawi tur zat hi hemi hun chhung hian Rs nuai 35.02 niin department hian an chawi tir lo. Department chuan central lama sorkar endiktu lam a\anga zawhna a awm tak avangin chawi tir turin hma a la a. Thu thar hnuhnung ber (February, 2017) in a tarlan danin department hian quarry neitute chu an chawi tur zat lo pung zel nena belhkhawm Rs nuai 57.46 chu pe tla turin an hriattir a, an zinga pahnih chuan an pe tla a, pakhat chu tihtawp a ni tawh a, a dang zawng chuan an la chawi lo niin Zalen document kawl chuan a tarlang bawk. DG&MR chuan Mizoram sorkar ina inremna a lo siampui tawh Oil India Limited (OIL) leh Oil & Natural Gas Corporation Limited (ONGC) in dan anga annual fee an chawi tur an pek tur an tihkhawtlai avanga an chawi tur Rs nuai 60.43 pawh department hian an la chawi tir lo niin thu dawn a ni a. Hetih lai hian company pahnih te hian Ministry of Petroleum & Natural Gas in an license an pawh sei na tur an tihhlawhtlin lawk loh vanga annual fee an pek tur an khawtlai phah thu an sawi bawk a ni.